Qazaqstanǵa 500 myń doza qyzylshaǵa qarsy vaktsına ákelindi

Búgin Almatyǵa qosymsha jappaı ımmýndaý júrgizý úshin 500 myń doza mólsherinde qyzylshaǵa, qyzamyqqa jáne parotıtke qarsy vaktsına partııasy keldi, dep habarlaıdy Kazinform.

Qazir Qazaqstanda qyzylshaǵa qarsy qosymsha vaktsınatsııa júrip jatyr. 

QR Densaýlyq saqtaý mınıstrligi halyqty ımmýndaý úshin vaktsınanyń qosymsha kólemin satyp alýdy pysyqtady. Jalpy, qosymsha jappaı ımmýndaý júrgizý úshin vaktsınanyń 1,5 mln astam dozasy satyp alyndy.

Kelgen vaktsına jedel tártipte QR DSM SEBK-niń bólýine sáıkes el óńirlerine jiberiledi.

Biryńǵaı dıstrıbıýtor ımmýnobıologııalyq preparattardyń logıstıkasyn barlyq GMP jáne GDP standarttaryn saqtaı otyryp júzege asyrady.

Vaktsınatsııa úshin «Serum Institute of India» shyǵarǵan qyzylshaǵa, qyzamyqqa jáne parotıtke (QQP) qarsy aralas vaktsına qoldanylady.

Bul vaktsınany óndirýde óndiriletin vaktsınalardyń sapasy men qaýipsizdigine kepildik beretin DDU aldyn ala biliktiligi bar.

Qyzylshaǵa qarsy vaktsına 60 jyl boıy qoldanylyp keledi jáne aýrýdyń taralýyn toqtatý úshin usynylady.

Bıyl elimizde, álemniń kóptegen elderindegideı, qyzylshamen syrqattanýshylyq boıynsha qolaısyz epıdemıologııalyq jaǵdaı baıqalady.

Qyzylsha — ınfektsııanyń taralýy aýa tamshylary arqyly bolatyn juqpaly vırýstyq ınfektsııalardyń biri.

Qyzylshamen aýyrmaǵan jáne oǵan qarsy egilmegen adamdar ómir boıy qyzylshaǵa óte sezimtal bolyp qalady jáne kez kelgen jasta aýyryp qalýy múmkin.

Densaýlyq saqtaý mınıstrligi el halqynyń arasynda qyzylshamen syrqattanýshylyqtyń odan ári taralýynyń aldyn alý maqsatynda 6 qarashadan bastap qyzylshaǵa qarsy qosymsha jappaı ımmýndaýdy bastady.

Birinshi kezekte 6 aıdan 11 aıǵa deıingi balalar vaktsına alady. 

Jeltoqsannan bastap egý mártebesine qaramastan 2 jastan 5 jasqa deıingi balalardy, medıtsına qyzmetkerlerin (55 jasqa deıin), sondaı-aq profılaktıkalyq egýdi ótkizip alǵan 18 jasqa deıingi adamdardy qyzylshaǵa qarsy qosymsha ımmýndaý josparlanǵan. 

Elimizde balaǵa josparly túrde eki ret ekpe salynady: alǵashqysy — 12-15 aılyǵynda, ekinshisin — 6 jasynda.