Qazaqstanǵa 380 mln teńgeniń zergerlik buıymdaryn alyp kelgen qyrǵyzstandyq sottaldy
ASTANA. QazAqparat - Qyrǵyzstan azamatshasy quny 380 mln teńge bolatyn qundy zattar kontrabandasy úshin Qazaqstanda sottaldy, dep habarlady Astana qalalyq Memlekettik kirister departamentiniń baspasóz qyzmeti.
MKD Ekonomıkalyq tergeýler qyzmetiniń aqparatyna sáıkes 2017 jylǵy 26 aqpanda qalanyń halyqaralyq áýejaıynda jedel izdeý sharalary barysynda «Ystanbul-Astana» reısimen kelgen Qyrǵyzstan azamatshasy ustaldy.
Odan Qazaqstan aýmaǵyna kontrabandalyq jolmen ákelgen 32,5 keli zergerlik buıymdary tárkilendi. Saraptama zattardyń ártúrli synamaly altynnan ázirlengenin rastady. Keıbir buıymdar gaýhar taspen kómkerilgen.
Asyl zattardyń quny 380 mln. teńge. Búginde Astana qalasy, Esil aýdany №2 aýdandyq sotynyń 06.06.2017 j. úkimimen azamatsha sottaldy, tárkilengen zattar memleket kirisine aýdaryldy.
