Qazaqstanǵa 2012 jyly 22,5 mlrd. dollar kóleminde tikeleı sheteldik ınvestıtsııa tartyldy
ALMATY. 26 maýsym. QazAqparat - Qazaqstanda táýelsizdik jyldary el ekonomıkasyna tartylǵan jalpy tikeleı sheteldik ınvestıtsııanyń (TShI) 50 paıyzǵa jýyǵy sońǵy 4 jyldyń úlesine tıesili.
«KAZNEX INVEST» Eksport jáne ınvestıtsııalar boıynsha ulttyq agenttigi» AQ Basqarma tóraǵasynyń orynbasary Qaırat Qarmanov búgin agenttiktiń alǵashqy jartyjyldyqtaǵy Qazaqstanǵa sheteldik ınvestıtsııalardy tartý boıynsha qyzmetin qorytyndylaýǵa arnalǵan baspasóz máslıhatynda osylaı aıtty.
Qaırat Qarmanovtyń aıtýynsha, álemdik tikeleı sheteldik ınvestıtsııalar túsiminiń teris serpinine qaramastan, elimizde onyń turaqtylyǵy saqtalyp kele jatyr. Máselen álemde qarjy daǵdarysynan keıingi jyldary TShI túsimi azaıyp, ınvestıtsııalar deńgeıi áli daǵdarysqa deıingi deńgeıge jete almaýda. Al Qazaqstanda byltyr ol rekordtyq kórsetkishke jetip, 22,5 mlrd. dollardy qurady. Atap aıtqanda 1993-2012 jyldary el ekonomıkasyna tartylǵan TShI-diń jalpy kólemi 171,2 mlrd. dollar bolsa, onyń 81,6 mlrd. dollary 2009-2012 jyldardyń úlesine tıip otyr.
