«Qazaqstanǵa - 20 jas» balalar úıleri tárbıelenýshileri arasyndaǵy óleń baıqaýynyń jeńimpazdary elordaǵa saıahat jasady

15 kúnge sozylǵan jyr músháırasyna túrli ult ókilderiniń jas aqyndary qatysyp, Ońtústik Qazaqstan oblysynda ornalasqan «Samal» saýyqtyrý lagerinde demaldy. Olardyń aqyndyǵyn oblysqa tanymal aqyndar, jazýshylar, respýblıkanyń kórnekti qoǵam qaıratkerleri baǵalady. Olardyń qatarynda QR Parlamenti Májilisiniń depýtaty Shalataı Myrzahmetov te boldy.

Keshe atalǵan sharany uıymdastyrýshylar jyr músháırasynyń qorytyndysyn shyǵaryp, balalar úılerinde tárbıelenip jatqan 300 jetkinshikten úzdik 20 aqyndy tańdap aldy. Jeńimpazdar, sondaı-aq olardyń tárbıeshileri men uıymdastyrý komıtetiniń músheleri arnaıy avtobýs jaldap, elordaǵa saıahattap keldi.

Osyǵan oraı búgin atalǵan baıqaýdy uıymdastyrýshylar elordadaǵy Beıbitshilik pen kelisim saraıynda BAQ ókilderine baspasóz máslıhatyn ótkizý kerek bolatyn. Degenmen, sharany uıymdastyrýda kemshilikter oryn alyp, baspasóz máslıhaty ashyq alańda ótti. «Biz bul jaıtqa qapalanbaımyz. Óıtkeni, balalar elordamyz Astanaǵa saıahat jasaýǵa múmkindik alyp otyr», - dedi shymkenttik jeke kásipker, is-sharany uıymdastyrýshy Nurhan Tilegenov.