«Qazaqstanǵa 2 myń tálip keledi»: Qańtardaǵy búlik kezinde qandaı feık-aqparattar tarady

NUR-SULTAN. QazAqparat – Qańtar oqıǵasy kezinde halyq arasynda úreı týdyrý úshin kóptegen jalǵan aqparat taratyldy. Bul týraly QR Bas prokýratýrasy Arnaıy prokýrorlar qyzmetiniń bastyǵy Rızabek Ojarov aıtty, dep habarlaıdy QazAqparat tilshisi.

«Qańtar oqıǵasy tusynda áleýmettik jeliler arqyly jalǵan habarlamalar kóp taratyldy. Olardyń qatarynda «Almaty men elordada sýdyń lastanýy», «elimizge eki myń tálip sodyrynyń kelýi», «Almatydaǵy bıozerthananyń basyp alynýy», «Telefondardyń tolyq tyńdalýy» týraly jalǵan aqparattar bar»,- dedi Rızabek Ojarov Ortalyq kommýnıkatsııalar qyzmetindegi brıfıng barysynda.

Onyń atap ótýinshe, bular halyq arasynda úreı týdyrý úshin taratylǵan.

«Osyndaı árbir jalǵan aqparat boıynsha Іshki ister mınıstrligi qylmystyq zańnamaǵa sáıkes protsessýaldyq sheshimder qabyldaıtyn bolady. Sondyqtan azamattarymyzdy resmı aqparat kózderine senip, jalǵan aqparat taratpaýdy suraımyn», - dedi Bas prokýratýra ókili.