Qazaqstanǵa 2 keli geroın alyp ótpek bolǵan Tájikstan azamaty ustaldy
NUR-SULTAN. QazAqparat - «Atameken» keden beketinde Ózbekstannan Qazaqstan terrıtorııasyna 2 kelige jýyq geroın alyp ótpek bolǵan tájik azamat ustaldy. Avtokóliktiń janarmaı ydysyndaǵy aq tústi untaǵy bar eki oramany keden beketiniń qyzmetkerli men qyzmettik ıti bar shekara narıady anyqtady, dep habarlaıdy Memlekettik kirister komıtetiniń baspasóz qyzmeti.
«29 maýsym kúni «Atameken» keden beketinde Ózbekstan Respýblıkasynan Qazaqstan Respýblıkasyna bet alǵan 1967 jylǵy Tájikstan azamaty júrgizip kele jatqan aq tústi «Nexia» markaly jeńil avtokólik shekaralyq jáne kedendik baqylaý júrgizý úshin tekserip qaraý alańyna ornalastyrylady. Tekserý jumystary nátıjesinde, Lamar atty qyzmettik ıt «Nexia» markaly jeńil avtokóliktiń janarmaı ydysy ornalasqan tusynan ıis sezip, belgi berdi» delingen habarlamada.
Málimetke saı, birlesken tekserý toby maı quıý baginiń tusynan qosymsha jalǵanǵan ydysqa uqsas temir konteıner qorapty baıqaıdy. Qoraptyń ishinde skotchtalǵan kúdik týǵyzatyn, shamamen salmaǵy 2 kg eki orama tabylady. Kólik júrgizýshisi oramada aq tústi untaq «geroın» ekenin, Tájikstan Respýblıkasynan Shymkent qalasyna jetkizý úshin tasymalǵa aqy alǵanyn aıtty.
Qazirgi tańda anyqtalǵan jaǵdaı boıynsha barlyq materıaldar Maqtaaral aýdandyq Іshki ister basqarmasyna jiberildi.
