Qazaqstanǵa 1,5 mlrd dollar kóleminde jańa ınvestıtsııa tartý kózdelip otyr
ASTANA. KAZINFORM — Qazaqstan Respýblıkasy Premer-mınıstriniń orynbasary — ulttyq ekonomıka mınıstri Serik Jumanǵarın Qytaıdyń jetekshi ónerkásiptik jáne agroónerkásiptik holdıngteriniń top-menedjmentimen birqatar mańyzdy kezdesý ótkizdi.
Qazaqstan ekonomıkasyna aýqymdy ınvestıtsııa tartýǵa arnalǵan kelissózder Úrimshi qalasyndaǵy «QazTrade» saýda saıasatyn damytý ortalyǵy» AQ ókildiginiń alańynda ótti.
Kezdesýdiń negizgi bir túıini — Qytaıdyń kómir óndirý, kómir hımııasy jáne jańa materıaldar óndirý salasyndaǵy iri ónerkásiptik holdınginiń biri China Ringmei Shenma Holding Group Co., Ltd. basshylyǵymen jasalǵan kelissózder. Qytaılyq kompanııa Qazaqstanda ınvestıtsııa kólemi $1,5 mlrd-qa deıingi zamanaýı kómir-hımııa keshenin salý boıynsha aýqymdy jobany júzege asyrý múmkindigin qarastyrýda. Joba qosylǵan quny joǵary ónim shyǵaryp, kómirdi tereń óńdeýdiń tolyq tsıklin qurýdy kózdeıdi. Kezdesýde China Ringmei Shenma Holding Group ókilderi Qazaqstanda tolyq tsıkldi zamanaýı ıntegratsııalanǵan kómir-hımııa keshenin qurý nıeti bar ekenin málimdedi. Olar bizdiń respýblıkany Ortalyq Azııadaǵy negizgi toptyń ınvestıtsııalyq alańy retinde qarastyrýda. Serik Jumanǵarın bul bastamany qoldap, Qytaı tarapyn Qazaqstanǵa shaqyrdy.
— Biz kómir hımııasy salasyndaǵy jobalardy qyzý qoldaımyz. Jobany súıemeldeýdi qamtamasyz etýge, sondaı-aq «Báıterek» holdıngimen jáne Qazaqstannyń damý bankimen birlesip, qarjylandyrý tetigin pysyqtaýǵa daıynbyz. Abaı oblysy da yntymaqtastyq úshin ashyq jáne jobany júzege asyrý úshin alań usynýǵa daıyn, — dep atap ótti Qazaqstan vıtse-premeri.
Kelissózderdiń nátıjesinde China Ringmei Shenma Holding Group jáne «QazTrade» saýda saıasatyn damytý ortalyǵy» AQ Qazaqstannyń kómir resýrstaryn ıgerý jáne kómir hımııa ónerkásibin damytý salasyndaǵy strategııalyq yntymaqtastyq týraly memorandýmǵa qol qoıdy.
Taǵy bir strategııalyq áriptes — bıotehnologııa, mal sharýashylyǵy, veterınarlyq vaktsına óndirisi, jem-shóp jáne aýyl sharýashylyǵy ónimin tereń óńdeý salasynda quzyreti mol Qytaıdyń Xinjiang Zhongxinjian Animal Husbandry Co. Ltd. ónerkásiptik toby.
Taraptar veterınarlyq preparat óndirýdiń zamanaýı tehnologııasyn Qazaqstanǵa berý, veterınarııa, mal sharýashylyǵy men ósimdik sharýashylyǵy salasynda keshendi sheshim engizý múmkindigin talqylady. Qazirgi zamanǵy agrotehnologııaǵa, sýarý júıelerine jáne joǵary aqýyzdy júgerini ósirýge erekshe nazar aýdaryldy.
Sondaı-aq, qytaılyq kompanııa «Qorǵas» AEA aýmaǵynda júzege asyrylatyn mal azyǵy júgerisin ósirip, jylyna 1 mln tonna júgerini tereń óńdeıtin ónerkásiptik park salý jobasyn usyndy. Qytaılyq áriptester «Azyq-túlik korporatsııasy» UK» AQ-men yntymaqtastyqtyń arqasynda naryqty egjeı-tegjeıli zertteı alǵanyn atap ótti.
Kelissózder barysynda Serik Jumanǵarın kompanııaǵa Abaı oblysyn agroónerkásiptik keshen jáne aýyl sharýashylyǵy ónimin tereń óńdeý salasyndaǵy birlesken jobalardy júzege asyrýdyń bazalyq alańy retinde qarastyrýdy usyndy.
Qazaqstan vıtse-premeri Dúnıejúzilik janýarlar densaýlyǵy uıymy sońǵy veterınarlyq shekteýdi alyp tastaǵannan keıin Qazaqstan mal sharýashylyǵy ónimin álemdik naryqqa eksporttaýǵa qosymsha múmkindik alǵanyn atap ótti. Osyǵan baılanysty qazaqstandyq tarap QHR standarttary boıynsha jumys isteıtin mamandandyrylǵan zerthana qurýdy, eksport úshin normatıvtik bazany jetildirýdi jáne shekara mańyndaǵy logıstıkalyq ınfraqurylymdy damytýdy kózdeıtin keshendi yntymaqtastyq modelin usyndy.
— Búginde Qazaqstan tiri maldy eksporttaýǵa emes, tereń óńdelgen daıyn ónimdi jetkizýge múddeli. Sapany baqylaý men zamanaýı logıstıka ınfraqurylymyn qurý qytaı naryǵyna qaıta óńdelgen ónim eksportyn edáýir arttyrýǵa múmkindik beredi, — dep atap ótti Serik Jumanǵarın.
Kezdesý sońynda taraptar jobalardy egjeı-tegjeıli pysyqtaýdy jalǵastyryp, yntymaqtastyqtyń jol kartalaryn daıyndaýǵa jáne ınvestıtsııalyq bastamalardy júzege asyrýǵa kóshý úshin mamandardyń ózara saparyn uıymdastyrýǵa kelisti.
Aıta ketelik iri halyqaralyq kompanııa Alatau City jobasyna ınvestıtsııa salýǵa nıetti.
