Qazaqstanǵa 1 mlrd teńge zalal keltirgen kúdikti Reseıden ekstradıtsııalandy
ASTANA. KAZINFORM — Bas prokýratýra men Іshki ister mınıstrliginiń Interpol Ulttyq ortalyq bıýrosynyń qyzmetkerleri, Qazaqstannyń Reseıdegi elshiliginiń qoldaýymen transulttyq qylmystyq top quramynda zańsyz kásipkerlik qyzmetpen aınalasqany úshin qylmystyq jaýaptylyqqa tartý úshin Reseı Federatsııasynan Qazaqstan azamaty ekstradıtsııalandy. Bul týraly Bas prokýratýra málim etti.
— Kúdikti, 2023 jyly Reseı Federatsııasynyń aýmaǵyna shyǵaryp satý maqsatynda, Qazaqstan aýmaǵy boıynsha aktsızdeletin taýarlardy (temeki) sáıkestendirý quraldarynsyz zańsyz saqtap, tasymaldaǵan. Nátıjesinde, aktsızdik salyqtyń Qazaqstan bıýdjetine túspegen qarajat 1 mıllıard teńgeni quraǵan. Kúdikti qylmys jasaǵannan keıin jasyrynǵan, osyǵan baılanysty halyqaralyq izdeý jarııalanǵan. 2025 jylǵy sáýirde ol Reseıde ustalyp, Bas prokýratýranyń suraýy boıynsha Qazaqstanǵa ekstradıtsııalandy, — delingen habarlamada.
Qazirgi ýaqytta kúdikti tergeý ızolıatoryna qamaldy. Aıyp taǵylǵan qylmystar úshin múlki tárkilenip, on eki jylǵa deıin bas bostandyǵynan aıyrý jazasy kózdelgen.
Buǵan deıin alaıaqtyq jasaǵan Qazaqstan azamaty Reseıden ekstradıtsııalanǵan bolatyn.
