Qazaqstandyqtarǵa jańa aıyppul salynatyndyǵy týraly aqparat jalǵan- komıtet
NUR-SULTAN. QazAqparat –Memlekettik kirister komıteti áleýmettik jeliler men messendjerler arqyly taraǵan jańa aıyppul týraly aqparattyń jalǵan ekenin jarııalady, dep habarlaıdy QazAqparat tilshisi.
«Sońǵy ýaqytta áleýmettik jeliler men messendjerler arqyly ótken salyqtyq kezeńder boıynsha bereshegi bar azamattar boryshyn osy jyldyń 1 qazanyna deıin ótemegen jaǵdaıda oǵan 8 AEK (20000 teńge shamasynda) kóleminde aıyppul salynatyny týraly habarlama taratylýda. Komıtet bul aqparattyń shyndyqqa janaspaıtynyn resmı túrde habarlaıdy», - dedi vedomstvanyń baspasóz qyzmeti.
Komıtettiń habarlaýynsha, jeke tulǵalar ótken jyl boıynsha jer jáne múlik salyqtaryn osy jyldyń 1 qazanyna deıin tóleýi tıis. Kólik salyǵy 31 jeltoqsanǵa deıin ótelýi kerek.
«Qoldanystaǵy QR Salyq zańnamasynda aıyppul esepteý sharalary kórsetilmegen. Tek salyqty ýaqtyly tólemegen jaǵdaıda ótkizilgen ár kúnge ósimpul esepteledi. Sondaı-aq, bıylǵy jyldyń aıaǵyna deıin jeke tulǵalarǵa arnalǵan salyqtyq raqymshylyq úrdisi júrýde. Onyń talaptaryna sáıkes, jeke tulǵa beresheginiń negizgi somasyn ótegen jaǵdaıda ósimpul avtomatty túrde esepten shyǵarylady», - delingen habarlamada.
