Qazaqstandyqtarǵa úıdegi ınternet operatoryn tańdaýǵa múmkindik beriledi

NUR-SULTAN. QazAqparat – Búginde kópqabatty turǵyn úılerde bir ǵana ınternet operatory qyzmet kórsetedi. Aldaǵy ýaqytta turǵyndardyń mobıldi operatordy tańdaý múmkindigi bolady. Bul týraly QR Tsıfrlyq damý, ınnovatsııalar jáne aeroǵarysh ónerkásibi mınıstrligi telekommýnıkatsııa komıteti tóraǵasynyń orynbasary Gúlnara Bókeeva málim etti, dep habarlaıdy QazAqparat tilshisi.

«Turǵyn úı keshenin salǵan kezde onyń ıesimen qandaı mobıldi operator bolatyny týraly kelisim jasalady. ıAǵnı turǵyndar úshin 1 mobıldi operator tańdalady. Bul jerde turǵyn úı salǵan jaýapty kompanııamen qatar, turǵyndardyń da pikiri eskeriledi. Qazirgi ýaqytta jańa zań jobasy qaralyp jatyr. Oǵan sáıkes turǵyndarǵa mobıldi operatordy tańdaý múmkindigi qarastyrylyp, ınternetke qol jetkizýde teń múmkindik berilmek», - dedi «AMANAT» partııasy alańynda ótken baspasóz máslıhatynda.

Májilis depýtaty Ekaterına Smyshlıaevanyń aıtýynsha, atalǵan zań jobasy baılanys naryǵyn monopolııasyzdandyrýǵa baǵyttalǵan.

«Zańda turǵyn úı nemese ǵımarat salǵan kezde baılanyspen qamtamasyz etý mindeti qatar qoıylady. Búginde bizdiń naryqta tek negizinen iri mobıldi operatorlar jumys istep jatyr. Shaǵyn operatorlardyń qatysa almaýy birqatar quqyqtyq shekteýler bar. Sonymen qatar bizdiń elimizde shaǵyn mobıldi operatorlar joqtyń qasy. Aıtalyq, olar shalǵaı aýyldarǵa barmaıdy. Óıtkeni abonentterdiń sany óte az, kommertsııalyq turǵydan tıimsiz. Al bizdiń qoıyp otyrǵan mindet – naryq básekesine tótep beretin, sapa úshin kúresetin jáne shalǵaı eldi mekenderdi baılanyspen qamtamasyz etetin shaǵyn baılanys operatorlarynyń kóptep paıda bolýy», - dep tolyqtyrdy depýtat.

Buǵan deıin habarlaǵanymyzdaı endigi ýaqytta qazaqstandyqtar jeke kýáliktiń elektrondyq nusqasyn qoldana alady.