Qazaqstandyqtarǵa tegin ámbebap ID-karta taratylady
Ámbebap kartany engizý QR Eńbek jáne halyqty áleýmettik qorǵaý mınıstrligi men «Eńbek resýrstaryn damytý ortalyǵy» AQ júzege asyratyn «Qazaqstan azamatynyń áleýmettik ID» jobasy aıasynda júrgiziledi. Joba Aqtóbe qalasynda sátti synaqtan ótti, endi ony elimizdiń barlyq óńirlerinde engizý bastaldy. Kartany 2020 jyldyń sońyna deıin taratyp bitý josparlanǵan.
ID kartany barlyq qazaqstandyqtar ala alady jáne ol tegin bolady. Birinshi kezekte olar zeınetkerlerge, memlekettik járdemaqylardyń barlyq túrin alýshylarǵa, sondaı-aq oqýshylarǵa beriledi. Karta berýmen «Qazposhta»AQ aınalysady.
Ámbebap kartada birqatar memlekettik qyzmetter biriktiriledi: zeınetaqy men járdemaqy alý, qoǵamdyq kólikte jol júrý aqysyn tóleý, saýda, medıtsınalyq jáne basqa da jelilerdegi taýarlar men qyzmetter úshin esep aıyrysýǵa bolady. Budan bólek, jol júrýge 50% jeńildik, shıpajaıda demalýǵa 100% ótemaqy alý múmkindigi bar.
Bul rette kartaǵa «maqsatty baqylaý» dep atalatyn júıe engizilmek. Bul, memlekettiń zattaı jeńildikterdiń ornyna aqshalaı beriletin qarajattyń (mysaly, balalar taǵamy, qalalyq kólikte júrý) basqa maqsattarǵa jumsalmaýyn qadaǵalaý úshin qajet.
Aıta keteıik, «Qazpochta» AQ bólimsheleriniń kassalarynda járdemaqy men zeınetaqy alýdyń balamaly tásili aldaǵy jyldary saqtalatyn bolady. Úkimet sheshimine sáıkes ámbebap kartaǵa tolyq kóshý 2023 jylǵa qaraı aıaqtalýy tıis.
«Ártúrli nusqalar qarastyryldy, sonyń ishinde NFS tehnologııasy bar QR-kodtar men smartfondardy paıdalaný boldy. Alaıda, mundaı sheshimder belgili bir qıyndyqtarǵa baılanysty qabyldanbady. Birinshiden, kóptegen zeınet jasyndaǵy azamattar smart-qurylǵylardy tolyq qoldana almaıdy. Ekinshiden, barlyq óńirlerdiń turǵyndary ınternetpen qamtylmaǵan. Sondyqtan ID kartany – onlaın jáne oflaın paıdalana alý úshin plastıkalyq karta túrinde shyǵarý týraly sheshim qabyldandy. Barlyq azamattar ony qalaı paıdalaný kerektigin biledi», - deıdi «Eńbek resýrstaryn damytý ortalyǵy» AQ múgedektikti belgileý jáne áleýmettik qyzmetterdi kórsetý boıynsha AJ damytý jáne súıemeldeý departamenti dırektorynyń orynbasary Álisher Elýbaev.