Qazaqstandyqtarǵa sheteldik bankterde shot ashýǵa tyıym salynýy múmkin - Aqyshev

ALMATY. QazAqparat - QR Ulttyq bankiniń basshysy Danııar Aqyshev Almatyda ótip jatqan onlaın-konferentsııa barysynda shetelge aqsha shyǵarý máselesimen kúres sharalary týraly aıtty, dep habarlaıdy QazAqparat tilshisi.

Onyń aıtýynsha, shetelge kapıtal shyǵarýǵa tyıym salý máselesi talqylaý ústinde.

«Transshekaralyq operatsııalarǵa tyıym salý únemi múmkin emes. Bul oraıda quzyrly organdar Qarjy mınıstrligi, Memlekettik kirister departamenti, Ulttyq banktiń birikken jumysy bolýy kerek. Osy úsh organnyń aqparat almasý, tájirıbe almasý, qarjynyń qozǵalysy boıynsha belsendi jumysy qalaı jolǵa qoıylady, solaı shetelge aqsha jymqyrýmen kúres tıimdi bola bastaıdy», - dedi ol.

Osy maqsatta keshendi jospar qurylǵan.

«Qazaqstandyqtarǵa shetelde shot ashýǵa shekteý qoıý qarastyrylǵan. Kúdik týǵyzatyn operatsııalar týraly aqparat ta qol jetimdi. Bas qarjy retteýshisi úshin shetelge ketken aqsha lańkestikti qarjylandyrýǵa jumsalmaǵany mańyzdy»,- dedi Danııar Aqyshev.

Aıta ketý kerek, QR Ulttyq bankiniń basshysy Danııar Aqyshev Almatyda ótip jatqan onlaın-konferentsııa barysynda azamattardyń 40-tan asa saýalyna jaýap berdi.