Qazaqstandyqtarǵa Majarstan jáne Qytaı ýnıversıtetterinde bilim alýǵa granttar berildi
ASTANA. QazAqparat - Sheteldik joǵary oqý oryndarynda oqýǵa úmitkerlerdi irikteý jónindegi komıssııanyń sheshimimen 300-den astam qazaqstandyq abıtýrıent Majarstan jáne Qytaı joǵary oqý oryndarynyń grantyna ıe boldy, dep habarlaıdy QazAqparat.
«Komıssııanyń sheshimimen Majarstan joǵary oqý oryndarynda bilim alý úshin irikteýden ótken 200 talapkerge, sondaı-aq Qytaı joǵary oqý oryndarynda bilim alý úshin 125 talapkerge grant berildi», - dep málimdedi QR Bilim jáne ǵylym mınıstrliginiń baspasóz qyzmeti.
Qazaqstan Respýblıkasynyń Úkimeti men Majarstan Respýblıkasynyń Úkimeti arasyndaǵy joǵary jáne joǵary bilimnen keıingi bilim berý salasyndaǵy yntymaqtastyq týraly kelisimge sáıkes, Majarstan 200 grant bólgen. Sonyń 90-y bakalavrıat, 90-y magıstratýra jáne 20-sy doktorantýrada oqý úshin berildi. Oǵan aǵymdaǵy jyldyń 22 qańtarynan 23 aqpanyna deıin qujat qabyldandy. Jalpy 872 adam majar elinde joǵary bilim alýǵa nıet bildirgen.
Sondaı-aq, QR jáne QHR Úkimetteri arasyndaǵy kelisim boıynsha 2018-2019 oqý jylynda 125qazaqstandyq Qytaıda oqıdy. Osy grantty alý úshin 20 aqpannan 7 naýryzǵa deıin 325 adam qujat tapsyrǵan.
QR Bilim jáne ǵylym mınıstri Erlan Saǵadıevtiń bastamasymen ashyqtyq pen jarııalylyqty qamtamasyz etý maqsatynda komıssııa quramyna QR Parlamenti Senatynyń, QR Parlamenti Májilisiniń depýtattary, ÚEU, BAQ, sol memleketterdiń elshilikteriniń ókilderi kirdi. Al QR BǴM ókilderi bul komıssııanyń quramyna alynbady.
