Qazaqstandyqtarǵa Koreıadan aýdarylatyn qarjy eki esege ósken

Habarlanyp otyrǵanyndaı, aqsha aýdarymy júıesi arqyly jeke tulǵalardyń Qazaqstanǵa aqsha aýdarýynyń mólsheri - osy jyldyń qańtar-tamyz aılarynda 220,5 mlrd teńgege jetken. Bul kórsetkish - ótken jyldyń sáıkes kezeńimen salystyrǵanda 15,2 paıyzǵa artyq. Aqsha kóleminiń artyp kele jatqanyna qaramastan, ósim qarqyny osymen ekinshi jyl tómendep keledi. Bir jyl burynǵy sáıkes kezeńde ósim 18,8 paıyzdyq kórsetkish bolsa, odan burynǵy ósim byltyrǵydan 2,4 ese kóp bolǵan.

Aqsha aýdarymy júrgizilgen memleketterdiń ishinde  Reseı kósh bastap tur. Ol elden qańtar-tamyz aılarynda 111,8 mlrd teńge aýdarylǵan. Bul kórsetkish 2017 jyldyń qańtar-tamyz aılarynan qaraǵanda 0,5 paıyzǵa az. Aýdarylǵan barlyq aqshanyń ishinde reseılik úles 58,7 paıyzdan 50,7 paıyzǵa tómendegen.

Odan keıingi orynda - Ońtústik Koreıa. Ol elden qazaqstandyqtarǵa 33,6 mlrd teńge aýdarylǵan. Ósim - 2,3 esege artyp otyr. Atalmysh elden jiberilgen qarajat 7,6 paıyzdan 15,2 paıyzǵa joǵarlaǵan.

Kóshbasshylardyń úshtigin Qyrǵyz Respýblıkasy túıindeıdi. Ol elden qazaqstandyqtarǵa 18,4 mlrd teńge aýdarylypty. Bir jyldyń ishinde ósim 67,8 paıyzdy kórsetip, shetelden aýdarylǵan barlyq qarajattyń ishindegi «qyrǵyz úlesi» 5,7 paıyzdan 8,4 paıyzǵa ósken.

Eske sala ketsek, Ońtústik Koreıada zańsyz júrgender Qazaqstanǵa esh kedergisiz orala alatynyn buǵan deıin QR Syrtqy ister mınıstrligi baspasóz qyzmetiniń jetekshisi Aıbek Smadııarov málim etken edi. Onyń aıtýynsha, Koreıa Respýblıkasynyń Úkimeti 2018 jylǵy 1 qazannan 2019 jylǵy 31 naýryzǵa deıin Ońtústik Koreıa aýmaǵynda zańsyz júrgen shetel azamattaryna «jasyl dáliz» rejimin engizgenin jarııalaǵan. Osy shara aıasynda qazirgi kezde atalǵan eldiń aýmaǵynda otyz kúnnen kóp júrgen, sondaı-aq vızasy nemese jumys isteýge ruqsaty joq sheteldikter 6 aı merzim ishinde óz elderine esh kedergisiz oralýyna bolady. Bul jaǵdaıda olarǵa eshqandaı aıyppul sharalary qoldanylmaıdy jáne bolashaqta Ońtústik Koreıaǵa qaıta barýyna shekteý qoıylmaıdy.