Qazaqstandyqtarǵa ıkemdi jumys kestesimen eńbek etý múmkindigi berilmek

ASTANA. QazAqparat – QR Eńbek kodeksine «Jyljymaly jumys kestesi» týraly jeke bap engizý usynyldy. Bul týraly Májilistiń qaraýyna engizilgen «QR keıbir zańnamalyq aktilerine áleýmettik qorǵaý máseleleri boıynsha ózgerister men tolyqtyrýlar engizý týraly» zań jobasynda jazylǵan, dep habarlaıdy QazAqparat tilshisi.

Parlamenttiń tómengi palatasynyń talqylaýyna berilgen qujatta QR Eńbek kodeksine ózgermeli jumys kestesi týraly jeke bap engizý usynylǵan.

«Jumys berýshi jumys tártibiniń erejelerinde jumyskerlerge jumys ýaqytynyń jıyntyq esebin qoldana otyryp, jumys kestesiniń kún saıynǵy uzaqtyǵynyń 11 saǵattan aspaıtyn shekteýlerin saqtaı otyryp, jumys kestesiniń uzaqtyǵy ártúrli aptanyń ártúrli kúnderindegi jumystyń jyljymaly kestesin belgileýge quqyly. Onyń sheginde jumyskerlerdiń osy sanaty úshin ortasha belgilengen, biraq toqsannan aspaıtyn jumys ýaqytynyń uzaqtyǵy saqtalýǵa tıis kezeń – jyljymaly jumys kestesi kezindegi eseptik kezeń dep tanylady», - delingen jańa bapta.

Eńbek jáne halyqty áleýmettik qorǵaý mınıstrliginiń málimetinshe, ıkemdi jumys kestesimen qyzmet etýdiń talaptary men qaǵıdasy eńbek shartyn jasaý kezinde bekitiledi.

«Búgingi tańda is júzinde jyljymaly jumys kestesi barlyq jerde qoldanylady jáne usynylǵan túzetý osy jumysty zańnamalyq retteýge baǵyttalǵan», - delingen engizilgeli otyrǵan bapqa berilgen mınıstrlik túsindirmesinde.

Aıta keteıik, sonymen qatar QR Eńbek kodeksine onlaın jumys isteıtinderdiń qyzmetin retteıtin jeke bap engizilmek.

Syrqaty boıynsha eńbekke ýaqytsha jaramsyzdyq paraǵyn rásimdegen qyzmetkerge tólenetin járdemaqy kólemin de ulǵaıtý kózdelip otyr.

Sondaı-aq 4 kúndik jumys aptasyna kóshý týraly zań jobasy da Májilis qaraýyna usynylyp otyr.