Qazaqstandyqtarǵa balalarmen serýendeýdi toqtata turýǵa keńes berildi
NUR-SULTAN. QazAqparat – Qazaqstandyqtarǵa sábılermen jáne balalarmen serýendeýdi toqtata turýǵa keńes berildi, dep habarlaıdy QazAqparat tilshisi.
«Sábılerge qatysty aıtarym, olardy qorǵaý kerek. Olardyń da úıde bolǵany jón. Olarǵa maska izdeýden buryn qorǵaý kerek», - dedi Premer-Mınıstrdiń orynbasary Eraly Toǵjanov Ortalyq kommýnıkatsııalar qyzmetinde ótken baspasóz máslıhatynda.
Úkimet basshysynyń orynbasary bul rette másele sábılerge ǵana emes, balalarǵa da qatysty ekenin atap ótti.
«Osynaý aralyqta serýendeýdi toqtata turýdy suraımyn. Balalardyń densaýlyǵy men keleshegi úshin oılanýymyz kerek», - dedi Eraly Toǵjanov.
Óz kezeginde Densaýlyq saqtaý mınıstri Alekseı Tsoı balalarǵa arnalǵan medıtsınalyq maskany ár adam óz úıinde tigip alýǵa múmkindik baryn eske saldy.
«Rezeńkeni alyp, qııa salsa boldy. Maska kishireıip ketedi. Sábılerge arnalǵan maska dákeniń birneshe qabatynan turady. Óz qolyńyzben de jasaı alasyz», - dedi mınıstr.
Eske sala ketsek, Qazaqstannyń memlekettik bas sanıtarııa dárigeri Aıjan Esmaǵambetovanyń qaýlysy boıynsha halyqqa Qazaqstanda kóshede maska taǵyp júrý mindettelgen bolatyn.
