Qazaqstandyqtardyń jetim balalardy asyrap alýyn jeńildetý úshin zańnamalyq turǵydan jaǵdaı jasaý qajet - A. Saın
ASTANA. Naýryzdyń 5-i. Qazaqparat /Ernur Aqanbaı/ - Qazaqstandyqtardyń jetim balalardy asyrap alýyn jeńildetý úshin zańnamalyq turǵydan jaǵdaı jasaý qajet. Bul týraly búgin Aqordada Elbasy Nursultan Nazarbaevtyń Qazaqstannyń áıelder qaýymynyń ókilderimen kezdesýinde «Arýjan jáne Ko» prodıýserlik ortalyǵynyń dırektory Arýjan Saın aıtty,
dep habarlaıdy QazAqparat.
«Sheteldik azamattar bala asyrap alý úshin nege Qazaqstanǵa keletini jaıly oılandym. Shyn máninde osydan 100 jyl buryn shetelderde jetim balalar úıi qalypty qubylys bolatyn. Olar jetim balalardy asyrap alý jónindegi jumysty júıeli júrgizip, jaǵdaı jasady. Nátıjesinde olarda qazir balalar úıi joq. Sondyqtan da olar bizge keledi. Biz qaıyrymdylyq qorlarynyń qaýymdastyǵy aıasynda osy problemany zerttep, bizdiń elge bala asyrap alýǵa keletin elderdiń tájirıbesine sarpatama júrgizdik. Bizdiń elimizdiń aımaqtarynda jetim balalardy asyrap alǵysy keletin adamdardyń tizimi bar. Sonymen bir mezgilde bizde ishi balalarǵa toly úıler bar. Bulardyń arasynda zańnama kedergi bolyp tur, zań boıynsha kóptegen balalar asyrap alýǵa jatpaıdy», dedi A. Saın kezdesýde.
Ol mysal retinde mynany aıtty. Máselen, anasy balasyn tastap, alaıda balasynan bas tartqany jóninde hat jazbaı, perzenthanadan qashyp ketetin bolsa, zań boıynsha balany asyrap alý úshin 6 aı kútýge, anasyn tabýǵa, sodan keıin baryp sot sheshim kútýge týra keledi. Bul úderis 2-3 jylǵa sozylyp ketedi. Al, adamdar bolsa balany kóbinese 1 jasqa deıin asyrap alǵysy keledi.
A. Saınnyń pikirinshe, qazaqstandyqtardyń balany asyrap alýyn jeńildetý úshin zańnamaǵa tısti ózgerister engizý qajet. Ol úshin arnaıy usynystar da daıyndalǵan.
Memleket basshysy tıisti usynystardy QR Prezıdentiniń Keńsesine berýdi tapsyrdy.
