Qazaqstandyqtardyń jemqorlyqqa qarsy mádenıetin arttyrýǵa arnalǵan kitap jazylmaq

NUR-SULTAN. QazAqparat – Qazaqstanda sybaılas jemqorlyqqa qarsy mádenıetti odan ári qalystastyrý maqsatynda qalyń jurtqa arnalǵan kitap jazyp shyǵarylmaq. Bul týraly QR Prezıdentiniń janyndaǵy memlekettik basqarý akademııasynyń rektory Erlan Ábil málim etti, dep habarlaıdy QazAqparat tilshisi.

«QR Prezıdenti ákimshiligi, QR memlekettik qyzmet isteri agenttigi jáne sybaılas jemqorlyqqa qarsy is-qımyl agenttiginiń ótinimderine sáıkes memlekettik basqarý jáne memlekettik qyzmetti damytý máseleleri boıynsha zertteýler júrgizildi. Ótken jyly qarashada aýyl ákimderin saılaýǵa halyqtyń qanaǵattanýy jáne ákimderdiń tikeleı saılaý ótkizý rásimine qanaǵattanýy máselesine arnalǵan áleýmettik zertteýleriniń nátıjeleri boıynsha taldamalyq esep jasaldy», - dedi Erlan Ábil QR Memlekettik qyzmet isteri agenttiginiń keńeıtilgen alqa otyrysynda.

Onyń aıtýynsha, memlekettik basqarý jáne qyzmet salasynda birqatar zertteý jobalary iske asyp jatyr.

«Sybaılas jemqorlyqqa qarsy is-qımyl agenttigimen birlesip, halyqaralyq reıtıngtik agenttikterdiń zertteý nátıjeleri, Qazaqstannyń ondaǵy orny týraly taldaý jáne anyqtamalyq materıaldar ázirlendi. Sonymen qatar qalyń jurtshylyqqa arnalǵan sybaılas jemqorlyqqa qarsy mádenıetti qalyptastyrýdyń negizderi men qazirgi zamanǵy tetikteri týraly «Parasatty minez-qulyq negizderi» kitabyn daıyndaý boıynsha jumys júrip jatyr», - deıdi ol.