Qazaqstandyqtardyń jeke málimetteri álemjelide zańsyz jınalyp jatqany anyqtaldy

NUR-SULTAN. QazAqparat – «KZ-CERT» kompıýterlik oqıǵalarǵa áreket etý qyzmeti qazaqstandyqtardyń jeke málimetteriniń jınalý jaǵdaıy tirkelgenin jarııa etti, dep habarlaıdy QazAqparat tilshisi atalmysh qyzmettiń

«KZ-CERT» qyzmetine jýyrda Nur-Sultan qalasynyń bilim basqarmasynan ótinim kelip túsken.

Basqarmadan habarlanǵandaı, jýyrda balalardy balabaqshalarǵa tirkeý boıynsha aqyly qyzmet kórsetetin áleýmettik jelidegi paraqshalar jumys isteı bastaǵan. Osy rette atalmysh paraqshalar qazaqstandyqtardyń jeke málimetterin zańsyz jınap jatqany azamattardy alańdata túsken.

«KZ-CERT» óz kezeginde taldaý jumystaryn júrgize otyryp, Instagram jelisi men «OLX» onlaın-dúkeninde kelesi mátindegi aqparattyń taraǵanyn anyqtap otyr: «Bizdiń paraqsha balabaqshalardaǵy oryndarǵa táýlik boıy monıtorıng júrgizýmen aınalysady. Biz e.astana.kz elektrondy ákimdiginiń saıty arqyly jumys júrgizemiz. Bul Qazaqstan Respýblıkasynyń jalpy halqyna qoljetimdi saıt. Saıtqa elektrondy tsıfrly qoltańba (ETsQ) arqyly kirýge bolady. Siz tek ózińizdiń úıińizge jaqyn balabaqshany tańdap alyp, ETsQ kiltin usynsańyz boldy. ESKE SALAMYZ: barlyq jumys zań aıasynda júrgiziledi. Tek baǵyttama berilgennen keıin ǵana aqy alynady. Osydan keıin Sizdiń barlyq jeke málimetterińiz sátti túrde joıylady».

Internet oqıǵalaryna jaýapty qyzmet atalmysh jaǵdaıda jeke málimetterdi jınaý jumysy sendirý tetigi arqyly júrgizilip jatqanyn eskertedi.

«Balany balabaqshaǵa kezekke ornalastyrý, kezek nómirin baqylaý, balabaqshaǵa baǵyttama alý – barlyq qyzmetterdi ata-analar e.astana.kz portalynyń saıtynan tegin ala alady. Onyń ústine atalmysh qyzmetter úshin eshqandaı ETsQ-nyń qajeti joq. Avtorızatsııalaý men ary qaraı qyzmetti alý úshin JSN nómirin, ata-ananyń telefon nómirin jáne bir ret tekserýshi SMS-parol nómirin engizseńiz bolǵany. Sol sebepti, bógde adamnyń bul formalardy toltyrýy QR zańnamasyna qaıshy keledi. Siz bergen ETsQ kilti men jeke málimetterińiz basqa maqsatta paıdalanbaıdy dep eshkim kepildik bermeıdi», - dep túsindirdi Nur-Sultan qalalyq bilim basqarmasynyń strategııa, taldaý jáne tsıfrly tehnologııalar bóliminiń basshysy Jazıra Asanova.

Kez kelgen adamnyń ETsQ kiltin taýyp alý arqyly alaıaqtar «Elektrondy Úkimet» portalynda azamattardyń jeke málimetterin paıdalanyp, memlekettik qyzmettiń túr-túrin ala alady. Osyǵan baılanysty «KZ-CERT» qyzmeti men elordanyń bilim basqarmasy barlyq ata-analarǵa osyǵan uqsas málimdemelerge senbeýge, qyzmettiń bárin e.astana.kz resmı júıesinde alýǵa shaqyrady. Joǵaryda atalǵan ınternet-resýrstar anyqtalǵan jaǵdaıda 1400 nómirine habarlasýǵa nemese @kzcert telegramm tobyna habar berýge bolady.

«KZ-CERT» kompıýterlik oqıǵalarǵa áreket etý qyzmetiniń nómiri men elektrondy poshtasy: 8-717-255-99-97, 1400(mob.) E-mail: [e-mail]; [e-mail] https://t.me/kzcert.

Aıan Bekenuly