Qazaqstandyqtardyń jan basyna shaqqandaǵy tabysy 5,4% artty
NUR-SULTAN. QazAqparat – Finprom.kz saıty halyqtyń jan basyna shaqqandaǵy ortasha tabysy týraly jańa málimetterdi jarııalady, dep habarlaıdy QazAqparat.
«2019 jyldyń 3 toqsanynda Qazaqstan halqynyń jan basyna shaqqandaǵy ortasha ataýly aqshalaı tabysy 105,3 myń teńgeni qurady. Bul 2018 jyldyń sáıkes kezeńimen salystyrǵanda 11,1%-ǵa kóbirek. Sonymen birge, osy kezeńde tutyný taýarlary men qyzmetteri baǵasynyń 5,4%-ǵa ósýin eskersek, halyqtyń aqshalaı kiristeri naqty kóriniste 5,4%-ǵa ósti», - dep jazylǵan saıt habarlamasynda.
Ótken toqsanmen salystyrǵanda ataýly ósim 1,4%, naqty ósim – 0,7% qurady.
Ortasha alǵanda, sońǵy bes jylda halyqtyń ataýly aqshalaı tabysy jylyna 10,9%-ǵa artqan.
2019 jyldyń úshinshi toqsanynda halyqtyń jan basyna shaqqandaǵy ortasha ataýly aqshalaı tabysynyń eń joǵary kórsetkishi Atyraý oblysynda tirkelgen: 221,3 myń teńge kórsetkishi ortasha respýblıkalyq deńgeıden 2 esege artyq. Bul óńirdegi ataýly aqshalaı tabystyń naqty ósimi jylyna 8,9% quraıdy.
Ataýly aqshalaı kirister boıynsha ekinshi orynda elorda tur (169,5 myń teńge). Naqty kóriniste bul qalada jylyna 9,3%-ǵa ósim bar. Úzdik úshtikti Almaty qalasy túıindeıdi (150,4 myń teńge). Inflıatsııany eskersek, bul kórsetkish ótken jyldyń sáıkes kezeńimen salystyrǵanda 1,9% kóp.
Sonymen birge, Mańǵystaý (141,9 myń teńge) jáne Qaraǵandy (107,7 myń teńge) oblystary jan basyna shaqqandaǵy ataýly aqshalaı tabys boıynsha alǵashqy bestikke kirdi. Al Túrkistan oblysy eń tómengi kirisi bar aımaq bolyp qala beredi, bul kórsetkish ortasha respýblıkalyq deńgeıdiń 47,7% quraıdy.
