Qazaqstandyqtardyń zeınetaqy jınaǵy ınflıatsııaǵa «jelinip» ketpeı me

NUR-SULTAN. QazAqparat – Qazaqstandaǵy salymshylardyń zeınetaqy jınaǵy ınflıatsııaǵa «jelinip» ketpeı me? Tilshilerdiń bul suraǵyna Ortalyq kommýnıkatsııalar alańynda ótken baspasóz máslıhatynda «Biryńǵaı jınaqtaýshy zeınetaqy qory» AQ Basqarma bóraǵasy Janat Qurmanov jaýap berdi, dep habarlaıdy QazAqparat tilshisi.

«Bul shynynda da, zeınetaqy júıesindegi ózekti máselelerdiń biri. Zańǵa sáıkes, senimdi basqarýshylardyń biri – Ulttyq bank ekenin eske sala keteıin. Kúshine enip jatqan jańa normalarǵa sáıkes, basqarýdyń básekeli naryǵyn qalyptastyrý úshin zeınetaqy jınaǵyn basqarýshy kompanııalarǵa aýdarý múmkindigi berilip jatyr. Ulttyq banktyń basqarýy týraly aıtar bolsaq, bul baǵytta shuǵyl jáne kópdeńgeıli sheshimder qabyldanýda. Investıtsııalaý boıynsha negizgi baǵyt-baǵdardy Ulttyq qordy basqarý keńesi belgileıdi. Odan bólek Úkimet qaýlysyna sáıkes, zeınetaqy jınaǵyn ınvestıtsııa retinde paıdalanýǵa bolatyn qarjy quraldarynyń tizimi jasaqtalady. Bul – Úkimettiń quzyryndaǵy is. Osydan keıin Ulttyq bank ınvestıtsııalyq deklaratsııany qabyldaıdy», - dedi Janat Qurmanov.

Onyń aıtýynsha el ishinde salýǵa bolatyn ınvestıtsııa kózderi az bolǵandyqtan, zeınetaqy jınaǵynyń bir bóligi (úshten biri) sheteldik naryqtarǵa salynǵan.

«Investıtsııalaýdyń sapasyn saqtap turý úshin osyndaı sheshim qabyldanǵan. Ekinshiden, shetelge salynatyn ınvestıtsııa «qatty» valıýtamen salynatyndyqtan, bul jınaq teńgeniń qunsyzdanýynan táýelsiz. Investıtsııalaýda qoldanylatyn negizgi valıýta – AQSh dollary», - dedi ol.

Ol sonymen qatar qazaqstandyqtardyń zeınetaqy jınaǵynyń 40 paıyzy Qazaqstannyń óz ishindegi memlekettik qundy qaǵazdarǵa ınvestıtsııalanatynyn aıtyp ótti. «Bul da halyqaralyq tájirıbe», - deıdi ol.