Qazaqstandyqtardyń zeınetaqy jınaǵy 15 trln teńgeden asty

ASTANA. QazAqparat – 2023 jylǵy 1 naýryzdaǵy jaǵdaı boıynsha Biryńǵaı jınaqtaýshy zeınetaqy qoryndaǵy salymshylar jınaǵynyń jalpy somasy 15,1 trln teńgege jetti, dep habarlaıdy QazAqparat tilshisi.

Ranking.kz portalynyń dereginshe, byltyrǵy osy ýaqytpen salystyrǵanda zeınetaqy jınaqtarynyń kólemi birden 11,4 paıyzǵa nemese 1,5 trln teńgege ósti. Kórsetkishtiń ósýi jarnalar túrindegi kiris aǵyndary, sondaı-aq ınvestıtsııalyq kiris esebinen qalyptasty.

Jınaqtardyń ósýi jarnalardyń barlyq túrleri boıynsha baıqalady. Osylaısha, mindetti zeınetaqy jarnalary boıynsha jınaq kólemi 11,1 paıyzǵa artyp, 14,7 trln teńgege jetti. Bul qazaqstandyqtardyń barlyq jınaqtarynyń 97 paıyzyn quraıdy.

Mindetti kásiptik zeınetaqy jarnalary boıynsha zeınetaqy jınaqtary bir jylda 21 paıyzǵa artyp, 466,4 mlrd teńgege jetti. Bul rette eń kóp ósim (2 eseden astam) 3,8 mlrd teńgeni quraǵan erikti zeınetaqy jarnalary boldy.

Óńirler boıynsha zeınetaqy jınaqtarynyń eń kóp mólsheri Almatyda - 2,8 trln teńge nemese respýblıkadaǵy jalpy kólemniń 18,5 paıyzy. Odan keıin Astana - 1,4 trln teńge. Úzdik úshtikti Qaraǵandy oblysy túıindedi - 1,2 trln teńge.

Zeınetaqy jınaqtarynyń kólemi boıynsha kósh bastaǵan bes aımaqqa Shymkent (1,2 trln teńge) qalasy men Shyǵys Qazaqstan oblysy (832,5 mlrd teńge) da kirdi.