Qazaqstandyqtardyń zeınetaqy jınaǵy 13 trln teńgeden asty
Biryńǵaı jınaqtaýshy zeınetaqy qory salymshylarynyń shotynda 13,1 trıllıon teńge zeınetaqy jınaǵy qalyptasty. Bir jyl ishinde onyń somasy 2,2 trıllıon teńgege artty nemese 21% ósti.
Zeınetaqy jınaǵynyń negizgi somasy mindetti zeınetaqy jarnasy esebinen quraldy, onyń mólsheri - 12,8 trln teńge. Mindetti kásiptik zeınetaqy jarnasy boıynsha - 324,4 mlrd teńge, al erikti zeınetaqy jarnasy 2,2 mlrd teńgege jetti.
2021 jyldyń 1 qańtarynan 1 aqpanyna deıingi bir aı ishinde BJZQ salymshylarynyń shottaryna 176,7 mlrd teńge mólsherinde taza ınvestıtsııalyq tabys eseptelgenin atap ótken jón, bul ótken 2020 jyldyń sáıkes kezeńimen salystyrǵanda 148,5 mlrd teńgege artyq.
2021 jyldyń basynan beri BJZQ salymshylarynyń shottaryna 88,9 mlrd teńge taza ınvestıtsııalyq tabys esepteldi. Bul 2020 jyldyń sáıkes kezeńimen salystyrǵanda 2,3 mlrd teńgege nemese 3% artyq. Jarnalardyń jalpy kóleminiń 93,3% BJZQ-ǵa MZJ boıynsha túsimder quraıdy – 82,8 mlrd teńge (ósim 2%), 5,9 mlrd teńge (ósim 20%) MKZJ boıynsha kelip tústi, 29 mln teńge (ósim 82%) EZJ boıynsha aýdaryldy.
2021 jylǵy 1 aqpandaǵy jaǵdaı boıynsha BJZQ-daǵy jeke zeınetaqy shottarynyń sany 11,6 mln birlikti qurady (jyl ishindegi ósim 11%). Shottardyń eń kóp sany mindetti zeınetaqy jarnalary (MZJ) boıynsha ashyldy – 10 977 453 (jyl ishindegi ósim 11%). Odan ári MKZJ esebinen qalyptasqan shottar - 529 571 (ósim 4%), BJZQ-daǵy EZJ esebinen qalyptasqan shottar sany qazir 59 034 (ósim 8%).
Tólemder 73,8 mlrd teńgeni qurady, 2020 jylǵy 1 aqpandaǵy kórsetkishtermen salystyrǵanda soma 55,9 mlrd teńgege ulǵaıdy. Kóp jaǵdaıda mundaı ósý 2021 jylǵy 30 qańtarda Úkimettiń 2021 jylǵy 19 qańtardaǵy qaýlysymen bekitilgen Zeınetaqy tólemderin, turǵyn úı jaǵdaılaryn jaqsartý jáne (nemese) emdelýge aqy tóleý maqsatynda birjolǵy zeınetaqy tólemderin júzege asyrý qaǵıdalarynyń kúshine enýimen baılanysty.