Qazaqstandyqtardyń zeınetaqy jınaǵy 12,8 trln teńgege jetti
2021 jyldyń 1 tamyzyndaǵy jaǵdaı boıynsha Biryńǵaı jınaqtaýshy zeınetaqy qory salymshylarynyń shottarynda 12,8 trıllıon teńge zeınetaqy jınaqtary qalyptasty. Soma 759 mıllıardtan asa teńgege nemese 6% ósti.
Zeınetaqy jınaqtarynyń negizgi somasy mindetti zeınetaqy jarnalary (MZJ) boıynsha qalyptasty, onyń mólsheri 12,5 trln teńge. Mindetti kásiptik zeınetaqy jarnalary (MKZJ) boıynsha zeınetaqy jınaqtarynyń somasy 335,7 mlrd teńge, al erikti zeınetaqy jarnalary (EZJ) boıynsha zeınetaqy jınaqtarynyń somasy 1,6 mlrd teńgege jetti.
1 tamyzdaǵy jaǵdaı boıynsha BJZQ-da 11,6 mln jeke zeınetaqy shoty bar. Shottyń eń kóbi mindetti zeınetaqy jarnalary (MZJ) boıynsha ashyldy, olardyń sany – 10,9 mln. Odan ári MKZJ esebinen qalyptasqan shottar – 529 myń, BJZQ-daǵy EZJ esebinen qalyptasqan shottar sany qazir 49,6 myń.
2021 jyldyń jeti aıynda JZSh-ǵa túsken jarnalar kólemi ótken jyldyń sáıkes kezeńindegi kórsetkishten 23% asyp, shamamen 741 mlrd teńgege jetti. Basym bóligin – 708,7 mlrd teńge nemese 95,7% - MZJ boıynsha aýdarymdar quraıdy.
BJZQ tólemderi jyl basynan beri 1,8 trln teńgeden asty. Jalpy somanyń shamamen 1,7 trln teńgesi birjolǵy zeınetaqy tólemderi (BZT) túrinde turǵyn úı jaǵdaıyn jaqsartý jáne emdelý úshin tólendi. Bul rette turǵyn úı jaǵdaıyn jaqsartýǵa ortasha tólem 4,4 mln teńgeni, emdelýge ortasha tólem - 0,9 mln teńgeni qurady.
Zeınet jasyna tolý boıynsha tólemder 54,7 mlrd teńgeden asty. Keste boıynsha aı saıynǵy ortasha tólem somasy (zeınetkerlik jasqa tolýyna baılanysty) 28,6 myń teńgeni qurady, jasyna baılanysty aı saıynǵy eń joǵary tólem 673,6 myń teńge.