Qazaqstandyqtardyń zeınetaqy qoryndaǵy jınaqtary 13,1 trln teńgege jetti
Qor málimetinshe, bul soma zeınetaqy jarnalary men ınvestıtsııalyq tabysty qamtıdy.
Zeınetaqy jınaqtarynyń edáýir ósýi 2021 jyldyń 1 qańtary men 2022 jyldyń 1 qańtary aralyǵynda 1,4 trln teńgeden asqan taza ınvestıtsııalyq tabystyń arqasynda qamtamasyz etildi, bul byltyrǵy kórsetkishten 138,2 mlrd teńgege nemese 11% artyq. Qazaqstan Ulttyq bankiniń basqarýymen BJZQ zeınetaqy aktıvteri boıynsha kiristilik jyl basynan beri 11,13%, al ınflıatsııa 8,4% qurady.
Esterińizge sala keteıik, ınvestıtsııalyq tabystyń quramyna baǵaly qaǵazdar (salymdar jáne basqa operatsııalar) boıynsha syıaqy túrindegi kirister, qarjy quraldaryn naryqtyq qaıta baǵalaý túrindegi kirister, valıýtalyq qaıta baǵalaý túrindegi kirister, syrtqy basqarýdaǵy aktıvter boıynsha kirister jáne taǵy basqalary kiredi.
«Jalpy, barlyq zeınetaqy aktıvteri BJZQ-ǵa biriktirilgen sátten bastap Ulttyq bank qamtamasyz etken ınvestıtsııalyq tabys 6,04 trln teńgege jetti. Bul rette 2022 jyldyń 1 qańtaryndaǵy jaǵdaı boıynsha jınaqtaýshy zeınetaqy júıesiniń qurylǵan kúninen bastap (1998 jyl) ınvestıtsııalyq kiristilik ósý qorytyndysymen – 681,13%, al ınflıatsııa 546,77% boldy. Osylaısha, jınaqtaýshy zeınetaqy júıesi qoldanysqa engen kezden bastap 2022 jyldyń 1 qańtaryna deıingi kezeńde zeınetaqy aktıvteriniń naqty kiristiligi 134,36%» - delingen habarlamada.
Aıta ketý kerek, zeınetaqy jınaqtary – bul uzaq merzimdi ınvestıtsııalar, ári ınvestıtsııalyq tabystyń mólsherin keminde 1 (bir) jyl kezeńinde taldaý oryndy. Qysqa merzimdi derekter (apta saıynǵy, aı saıynǵy jáne t.b.) – aıqyn nátıje kórsetpeıdi. Óıtkeni, ol naryqtyń qubylmaly ózgeristerine táýeldi.