Qazaqstandyqtardyń Úndistanǵa ushyp jetý ýaqyty 3 saǵatqa uzarǵan
NUR-SULTAN. QazAqparat - QR IIDM Azamattyq avıatsııa komıteti «Eır Astana» áýe kompanııasymen birge Úndistanǵa ushý saparlaryn toqtatýǵa jol bermeý boıynsha barlyq sharalardy qarastyryp jatyr, dep habarlaıdy QazAqparat tilshisi komıtettiń Feısbýktegi paraqshasyna silteme jasap.
«Qazirgi ýaqytta týyndaǵan máselelerdi sheshý úshin aımaq elderiniń avıatsııalyq bıligi barlyq sharalardy júrgizip jatyr. Ońtaıly sheshimge qol jetkizilgen jaǵdaıda áýe kompanııasynyń reısteri qaıtadan oryndala bastaıdy», - delingen komıtettiń habarlamasynda.
Buǵan deıin habarlanǵandaı, aımaqtaǵy qaýipsizdikke qatysty jaǵdaıdyń eskalatsııasyna baılanysty Úndistan men Pákistan halyqaralyq reıster boıynsha áýe baǵdarlaryn japqan bolatyn.
«Osydan keıin «Eır Astana» Úndistanǵa Maskat (Oman) qalasyna toqtaý arqyly nemese alys magıstraldi ushaqty qoldaný jolymen 49 reıs oryndady. Bul ózgerister ushý ýaqytyn birshama uzartqan bolatyn. Buǵan qosa janar-jaǵarmaı kóp jaǵylǵanymen, áýe kompanııasy bılet baǵasyn kóterý arqyly shyǵyndy jaýyp otyrǵan joq. Pákistandy aınalyp ótý arqyly Úndistanǵa ushyp barýdyń saldary jol saparyn 4 saǵattan 7 saǵatqa uzartyp otyr. Osynyń saldarynan bir jaǵynan jolaýshylarǵa jol tıimsiz bolsa, ekinshi jaǵynan áýe kompanııasy da artyq shyǵynǵa tap bolýda», - delingen kompanııanyń habarlamasynda.
Eske sala ketsek, osydan 2 aı buryn Pákistan Respýblıkasy áýe keńistiginiń búkil halyqaralyq áýe baǵyttaryna jabyqtyǵyna baılanysty «Eır Astana» áýe kompanııasynyń Delı - Almaty baǵytyndaǵy 27 aqpanǵa josparlanǵan reısi keıinge qaldyrylǵan bolatyn. QR SІM Úndistan men Pákistan arasyndaǵy áskerı-saıası jaǵdaıdyń shıelenisýine baılanysty málimdeme jasady.
