Qazaqstandyqtardyń turmys deńgeıiniń artýy - Konstıtýtsııanyń tıimdiliginiń arqasynda bolyp otyr - A. Esimov (FOTO)
Qala ákimi jınalǵan jurtshylyqty Konstıtýtsııa kúnimen quttyqtap, Qazaqstannyń budan ári gúldene berýine ıgi tilegin jetkizdi.
«Búgin Konstıtýtsııa kúni. 1995 jyly 30 tamyzda jańa Konstıtýtsııa qabyldandy. Bul elimizdiń eń negizgi zańy! Onyń qalyptasýyna Elbasymyzdyń sińirgen eńbegi ushan teńiz! Men ol kezde Úkimette vıtse-premer bolyp qyzmet atqaratynmyn. Qyrýar jumystar atqaryldy. Kóptegen elderdiń Ata zańdary zertteldi. Álemde aldyńǵy qatarly ozyq tájirıbeler paıdalanyldy. Jańa Konstıtýtsııa Qazaqstannyń jaǵdaıyna barynsha beıimdetildi. Sodan jalpy halyqtyq daýys berý arqyly qabyldandy. Konstıtýtsııanyń tıimdilgi - bul mine, mynaý bizdiń búgingi turmys deńgeıimiz! Qazaqstandyqtardyń turmys deńgeıiniń artýy - Konstıtýtsııanyń tıimdiliginiń arqasynda bolyp otyr - dedi Ahmetjan Esimov.
Sonymen qatar qala basshysy óz sózinde osy Ata zańnyń ázirlenip, qabyldanýyna úles qosqan, búgingi saltanatty sharaǵa jınalǵan ardager zańgerlerge de alǵysyn bildirdi. Olarǵa baǵaly syılyqtar tabys etildi.
Aıta ketelik, búgin tańerteń Almaty qalasynyń ákimi Konstıtýtsııa kúnine baǵyshtalǵan jalpy qalalyq velojarysqa da qatysty.