Qazaqstandyqtardyń tórtten biri ishimdikke áýes
ASTANA. QazAqparat - Sońǵy zertteý jumystary qazaqstandyqtardyń tórtten biriniń ishimdikke áýes ekendigin kórsetken. Bul týraly ortalyq kommýnıkatsııalar qyzmetinde ótken baspasóz máslıhatynda QR Densaýlyq saqtaý mınıstrligi «Densaýlyq saqtaýdy damytý» Respýblıkalyq ortalyǵynyń bas dırektory Aınur Aıyphanova aıtyp berdi, dep habarlaıdy «QazAqparat» HAA tilshisi.
«Ulttyq zertteý ortalyǵynyń zertteý málimetine súıensek, Qazaqstanda jalpy halyqtyń 24 paıyzy ishimdik ishedi», - deıdi Aınur Aıyphanova OKQ-da ótken baspasóz máslıhaty barysynda.
Onyń aıtýynsha, elimizdegi áıelderdiń 70 paıyzy ishimdikten boıyn aýlyq ustaıdy. Al er adamdardyń arasynda bul másele ózektiligin áli joımaı keledi. Іshimdikke qumarlyq elimizdegi adamnyń ómir jasynyń uzaqtyǵyna keri áserin tıgizýde. Sol sebepti, densaýlyq saqtaý salasyndaǵy máselelerdi retke keltirip, halyqtyń saýlyǵyn qamtamasyz etý úshin Qoǵamdyq densaýlyq saqtaý qyzmeti birqatar jumystardy qolǵa alǵan.
«Sońǵy jyldary Qazaqstanda qan aınalymy boıynsha ólim jitim 10 paıyzǵa azaıdy. Týberkýlezge shaldyǵý jaǵdaıy da tómendedi. Bunyń bári Qoǵamdyq densaýlyq saqtaý qyzmetiniń jumysynyń nátıjesi bolyp tabylady», - deıdi Aınur Aıyphanova.
