Qazaqstandyqtardyń tabysyna qatysty jalǵan aqparat bergender jazalanýy tıis - Almasbek Shaǵyrbaı
«Memleket basshysy Qasym-Jomart Toqaevtyń tóraǵalyǵymen 8 aqpanda ótken QR Úkimetiniń keńeıtilgen otyrysynda jaýapty memlekettik organdar, mınıstrlikter men oblys, qala ákimderiniń qatysýymen áleýmettik-ekonomıkalyq damý máseleleri talqylanyp, túıtkildi máselelerdi sheshý joldary tapsyryldy. Memleket basshysy atalǵan jıynda jyl basynda oryn alǵan oqıǵalar ulttyq qaýipsizdigimizge zor qater tóndirgenin basa aıtty. «Biz osyndaı qıyn jaǵdaıda el birliginiń arqasynda memleketimizdiń qaýipsizdigin, tipti de tutastyǵyn saqtap qaldyq. Qazir Úkimettiń basty mindeti – halyqtyń ál-aýqatyn arttyrý, sondaı-aq, azamattardyń tabysyndaǵy alshaqtyqty azaıtý jáne eńbek etýge qolaıly jumys oryndaryn ashý. Biz jurttyń bıznespen aınalysýyna teń múmkindik beremiz. Qoǵamymyzda beleń alǵan sybaılas jemqorlyqpen, ekonomıkadaǵy ásirese baılar ústemdiginiń saldarymen kúresemiz. Bárimiz eldiń ıgiligi úshin qyzmet etýge tıispiz» dep barsha qazaqstandyqtardy qoǵam turaqtylyǵyn saqtaýǵa shaqyrdy», - dedi ol.
Ortalyq dırektory atalǵan Úkimettiń otyrysynda Prezıdent tarapynan Qazaqstan halqynyń áleýmettik-ekonomıkalyq ahýaly, tabystaryn arttyrý, qarjy naryǵy, ekonomıkalyq damý joldary, qoǵamnyń osal toptaryn turmystyq baspanamen qamtamasyz etý, aýyl sharýashylyqty damytý mehanızmderi men zańnamalyq sheshimderi boıynsha naqty tapsyrmalar berilgendigine nazar aýdartady.
«Osy oraıda 2017-2020 jyldary Úkimettiń qoldaýymen memlekettik «Nurly jer» baǵdarlamasy boıynsha Nur-Sultan, Almaty, Shymkent qalalarynda túrli sala mamandaryna bastapqy jarnasyz baspana kilti tabystalǵanyn bilemiz. Baspana kezeginde turǵan jastar kóp. Osy máselelerdi eskere otyryp «Nurly jer» sekildi baǵdarlamalardy kóbeıtý qajet. «Qazirgi tańda 1 mıllıonǵa jýyq adamnyń tabysy eń tómengi kúnkóris deńgeıine de jetpeıdi. Bul – sońǵy 10 jyldaǵy eń nashar kórsetkish. Sóıte tura, ortasha jalaqy men jan basyna shaqqandaǵy tabys kólemi udaıy ósip keledi degen kópirme esep berilýde. Bul – naǵyz kózboıaýshylyq» degen málimette aıtyldy. Sońǵy 10 jylda berilgen jalǵan aqparattar zerttelip, olardy bergen ákimder jazalanýy tıis. Olaı bolmaǵan jaǵjaıda, bul faktilerdiń qaıtalanbaýyna kim kepil? «Jańa Qazaqstandy» eski kadrlarmen qurý da halyq arasynda kúdik týdyrady», - dedi Almasbek Shaǵyrbaı.
Ol dintanýshy retinde Prezıdent aıtqan jastar arasyndaǵy jaǵympazdyq, adal eńbek jasamaý máseleleri ıslam dininiń sharıǵaty turǵysynan da maquldanbaıtyn áreket bolyp sanalatyndyǵyn aıtady.
«Qazirgi tańda, jastardy qoǵamdyq tynyshtyq pen kelisimdi buzýǵa ıtermeleıtin faktorlardyń qatarynda teris pıǵyldy aǵymdardyń róli bar ekeni anyq. Jastar saıasaty máselelerinde birqatar olqylyqtar bar. Ásirese aýyl men qala jastarynyń ara qashyqtyǵy óte úlken. Aýyldaǵy jastardyń bilim, ǵylym, kásip, óner, sport jáne basqa da salalarda jetistikterge jetýge áleýmettik ınfraqurylym, aqparattyq resýrstardyń tapshy ekendigi anyq. Osyndaı ishki faktorlardyń nátıjesinde «Qańtar oqıǵasyna» qatysýshylardyń qataryna áleýmettik jaǵdaılary, qarjylyq múmkindikteri joǵary bolmaǵan keıbir jastarymyz arbaýshylar men arandatýshylardyń úgit-nasıhatyna qosylǵan degen pikir oryn alýda», - dedi ol.
Almasbek Shaǵyrbaıdyń atap ótýinshe, Qazaqstanda júrgizilgen túrli zertteýlerde jáne 2021 jylǵy «Halyq sanaǵy» qorytyndysy boıynsha halyqtyń orta jasy 30 jas ekendigi jazylǵan. Osyǵan oraı, jastar saıasatyn qoldaý baǵdarlamalaryn osy sanattaǵy qoǵamdyq toptaryna qoldaý kórsetý, áleýmettik-ekonomıkalyq jaǵdaılaryn jaqsartýdyń tıimdi ádisterin júzege asyrý qajettigi mańyzdy.
«Biraqatar usynystardy kelesi baǵyttarda usynamyz: jastar arasyndaǵy dinı ahýalǵa nazar aýdarýdy kúsheıtý, meshitke kelýshi jamaǵattardyń dinı kózqarastaryna taldaý júrgizý, teris pıǵyldy aǵymdardyń ustanymdaryn anyqtap, QMDB janyndaǵy resmı pikirleri arqyly túsindirýdi jalǵastyrý; ınternet keńistigindegi dinı ekstremızm men zańǵa qaıshy kontentterge monıtorıng júrgizý, tıisti túsindirý sharalaryn qoldaný, tehnıkalyq buǵattaýdy iske asyrý. Sózimdi qorytyndaı kele, elimizdiń ósip órkendeýine, qoǵam damýyna, eldiń birligine, qoǵam tynyshtyǵynyń basty faktory ol – qoǵamnyń turaqtylyǵy. Qoǵam turaqtylyǵyna bárimiz óz úlesimizdi qosyp kelemiz jáne ol jalǵasyn tabatynyna senimdimin», - Dintaný ortalyǵynyń dırektory.
