Qazaqstandyqtardyń sheteldegi qarýly qaqtyǵystarǵa qatysýy QR Zańy boıynsha qylmys bolyp tabylady - Bas prokýratýra
Sondaı-aq, Ýkraınanyń ońtústik-shyǵysyndaǵy qarýly janjalǵa qatysý maqsatynda jekelegen azamattardyń shyǵýy týraly málimetter bar.
Bul faktiler boıynsha quqyq qorǵaý jáne arnaıy memlekettik organdar qylmystyq ister qozǵap, tergeýde, al olardyń jekelegenderi boıynsha sottyń aıyptaý úkimderi shyǵaryldy.
Degenmen, qazirgi ýaqytta bizdiń azamattarymyzdyń shıelenis aımaqtaryna, sonyń ishinde azǵyryp kóndirýmen jáne urys qımyldary aımaǵyna tilek bildergenderdi jóneltýmen aınalysatyn tulǵalardyń kómegimen shyǵý talpynystary jalǵasýda.
Mundaı áreketter Qazaqstan Respýblıkasynyń Qylmystyq kodeksine sáıkes qylmys bolyp tabylady.
Atap aıtqanda, Qylmystyq kodekstiń 162-babymen jaldamalylyq, ıaǵnı, jaldamalyny jaldanýǵa azǵyryp kóndirý, oqytyp-úıretý, qarjylandyrý, sondaı-aq ony qarýly janjalda paıdalaný jáne qatysýy ómir boıy bas bostandyǵynan aıyrýǵa deıingi qylmystyq jaýapkershilikke ákep soǵatyny belgilengen.
Qylmystyq kodekstiń 162-1-babyna sáıkes jaldamalylyq belgileri bolmaǵan kezdiń ózinde shet memlekettiń aýmaǵyndaǵy qarýly qaqtyǵystarǵa nemese áskerı áreketterge quqyqqa syıymsyz qatysý da qylmys bolyp tabylady. Bul áreketti jasaǵandyq úshin jeti jylǵa deıingi merzimge bas bostandyǵynan aıyrý túrindegi jaýapkershilik kózdelgen.
Mundaı qylmystardyń erekshe qoǵamdyq qaýiptiligin, olardyń artynda beıbit azamattardy óltirý, olardyń turǵyn úılerin qıratý jáne ózge múlkinen aıyrý, urlaý men azaptaý turǵanyn atap ótý mańyzdy. Olar shet memleketterdegi ǵana emes, bizdiń de eldegi turaqtylyq pen beıbitshilikke qaýip-qater ákeledi.
Osyǵan baılanysty, Bas prokýratýra urys qımyldaryna qatysý maqsatynda eldi tastaýǵa talpynǵan Qazaqstan Respýblıkasynyń azamattaryn kórsetilgen qylmystardy jasaýdan saqtandyrady jáne bul úshin qylmystyq jaýapkershilik belgilengeni týraly eskertedi.
Kez kelgen mundaı sıgnaldar quqyq qorǵaý jáne arnaıy memlekettik organdardyń muqııat tekserisine ushyraıtynyn resmı eskertemiz.
Qazaqstan Respýblıkasy Qylmystyq kodeksiniń joǵaryda kórsetilgen baptaryndaǵy qylmysty josparlaǵany nemese jasaǵany týraly obektıvti aqparat bar adamdardyń barlyǵy biri qalmastan qylmystyq qýdalaýǵa ushyraıtyn bolady.
