Qazaqstandyqtardyń sheteldegi aqshasy men múlkin tekseremiz - Qarjy mınıstrligi
Salyq salý ádistemesi boıynsha departament dırektory Qaırat Jolmuxambetovtyń aıtýynsha, qazirgi ekijaqty kelisimder boıynsha basqa elderge suraý salý qajet. Sonda ǵana naqty bir salyq tóleýshige qatysty aqparat jiberiledi. Salyq túrin de kórsetý kerek. «Al Strasbýrg konventsııasy aıasynda barlyq salyqtar boıynsha aqparat almasýǵa bolady. Sosyn jazbasha aqparattan bólek avtomatty túrde málimet almasý tetigi de bar. Bul degenimiz, xat jazyp, suraý salýdyń qajeti joq. Budan bólek, salyqty óndirý boıynsha ózara kómek sharalary da bar. Birlesken tekseristerdi de ótkizetin bolamyzá, - dedi Q.Jolmuxambetov Astanada ótken baspasóz máslıxatynda.
Osydan bes jyl buryn Qazaqstan Strasbýrg konfentsııasyna qol qoıǵan bolatyn. Bir jyldan keıin atalǵan qujat ratıfıkatsııalandy. Sonyń aıasynda salyq salasyndaǵy aqparatpen avtomatty túrde ózara almasýǵa múmkindik bar. Osy ýaqytqa deıin konventsııaǵa 124 memleket qosyldy. Sonyń ishinde G20 jáne Ekonomkalyq yntymaqtastyq jáne damý uıymynyń elderi bar. Atalǵan eki uıym qarjy salasyndaǵy aqparatpen almasýdyń kópjaqty kelisimin ázirlep bekitti. Aǵymdaǵy jyly 26 maýsymda Qazaqstan atalǵan qujatqa da qosyldy.
«Endi, biz 102 memleketpen jumys jasap, qarjy esep-shottary týraly aqparatpen almasatyn bolamyz. Qazirgi kezde Qazaqstan EYDU-nyń arnaıy jumys tobyna kirip, atalǵan standartty engizýge qatysty daıyndyq sharalaryn bastap ketti. Osyǵan oraı, ulttyq zańnamaǵa tıisti ózgerister engiziletin bolady. Jospar boıynsha 2019 jylǵy barlyq aqparat beriledi. Sonda 2020 jyly qyrkúıek aıynda bizge jerlesterimizdiń 102 eldegi barlyq esep-shottary týraly aqparat túsedi. Ol elderdiń ishinde Ulybrıtanııa, Bermýd pen Kaıman araldary, Shveıtsarııa, Lıýksembýrg, Lıxtenshteın jáne taǵy basqalar bar. 40-tan astam ofshorlyq ıýrısdıktsııalar da osy bastamaǵa qosylyp otyr», - dep atap kórsetti Q.Jolmuxambetov.
Onyń aıtýynsha, jeke aqparattyń ishinde qarjy ıesiniń aty-jóni, salyqtyq nómiri, depozıt pen aktıvterden túsken tabystyń kólemi bolady. Alaıda ol aqparat qupııa málimetke jatady. «Aqshanyń somasyna qaramaımyz. Árbir qazaqstandyqtyń esepshoty týraly aqparatty aldyrtatyn bolamyz. Árıne, salyqtan jaltarǵany úshin jaýapkershilik qarastyrylǵan. Máselen, tabystan túsken salyqty tólemegeni úshin ákimshilik jaza da, qylmystyq jaza da bar. Negizi, búgingi zańnama boıynsha Qazaqstan azamattary sheteldegi aqsha men múlki týraly aqparatty ózderi usynady. Al konventsııa aıasynda aqparat almasý arqyly biz ol málámetterdiń bárin salystyryp, teksere alamyz», - dedi Q.Jolmuxambetov.
