Qazaqstandyqtardyń shet elderdegi demalys saparynda keleńsiz jaǵdaıdyń aldyn alý úshin nusqaýlyqtar daıyndaldy - SІM

QR Syrtqy ister mınıstrliginiń baspasóz qyzmeti taratqan aqparatqa qaraǵanda, 2011 jyly shet memleketterde 6 mıllıonǵa jýyq otandastarymyz bolyp qaıtqan. Osyǵan oraı, jyl saıyn shetelge shyǵatyn qazaqstandyqtar sanynyń artyp otyrǵanyn eskere kele, mınıstrlik arnaıy nusqaýlyqtar ázirlep shyqty. Onda demalys saparyna shyǵýshylar úshin mańyzdy máseleler qamtylyp otyr. Atap aıtqanda:

- QR SІM-niń www.mfa.kz ınternet paraqshasynda berilgen baratyn eldegi Qazaqstan Respýblıkasynyń elshiligi nemese konsýldyq mekemesiniń telefondaryn jazyp alý qajet;

- Bizdiń ınternet paraqshamyzda basqa da paıdaly aqparattarmen egjeı-tegjeıli tanysýdy usynamyz. Baratyn elderde ózińizge qajetti dári-dármekterdiń bar-joǵyn aldyn ala bilip alyńyz. Keıbir kezderde Qazaqstanda ońaı satyp alýǵa bolatyn dárilerdi, shet elde shyǵara bermeıdi nemese olardy tek dárigerdiń bergen nusqaýymen satyp alýǵa bolady;

-Shet elde bolatyn merzimge sáıkes dárigerlik saqtandyrý polısin alý qajet. Ol saıahat kezinde jazataıym oqıǵadan saqtaný men saqtandyrý polısinde kórsetilgen aıaqastynan bolǵan dárigerlik shyǵyndardan saqtanýǵa múmkindik beredi;

- Shet memlekette bolǵan kezde jergilikti zańdaryn, salt-dástúrlerin saqtaý, baratyn eldiń qajetti sóz tirkesterin bilý saıahatyńyzdy jeńildetedi. Pasport pen aqshany qaýipsiz jerde saqtaý qajet;»- delingen nusqaýlyqta.

Sonymen qatar, sońǵy ýaqytta Qazaqstan azamattarynyń jeke kýáligi, pasporttary men basqa da qujattarynyń shet elderde joǵalý jaıttary tirkelýde. Osyǵan oraı, SІM jeke basyn kýálandyratyn jáne QR azamattyǵyna qatystylyǵyn aıǵaqtaıtyn qujattardyń kóshirmesin jasap alý jáne kóshirmeni túpnusqadan bólek saqtaý qajettigin eskertedi. Budan bólek:

- Konsýldyq esepke turý qajettigin eskergen jón. Ol fors-majorlyq jaǵdaılarda Sizben ýaqytyly habarlasýǵa múmkindik beredi;

- Týystaryńyzben poshta, telefon nemese ınternet arqyly habarlasyp turǵanyńyz abzal.

«Osylarmen birge, baratyn elińiz týraly, onyń saıası jaǵdaıy, zańdyq jáne ulttyq dástúrleri, qoǵamdyq jáne basqa oryndarda júrip-turý erekshelikteri qosymsha aqparatty bilip alýdy laıyq sanaımyz. Kútpegen jaǵdaılar týyndaǵan kezde sheteldegi Qazaqstan Respýblıkasynyń dıplomatııalyq ókildiginen nemese konsýldyq mekemesinen kómek suraýyńyz qajet. Berilgen keńester shetelde ýaqytyńyzdy jaqsy ótkizýge jáne demalýǵa kómektesedi dep senemiz», - delingen nusqaýlyqta.

Budan basqa, mınıstrlik Shengen keńistigine múshe-memleketterde bolýdyń erekshelikteri týraly da eskertedi.

«Qazirgi tańda Shengen keńistigine týrıstik maqsatpen baratyn Qazaqstan Respýblıkasynyń azamattarynyń sany jyl saıyn ulǵaıýda. Sońǵy ýaqytta bir márte Shengen vızalaryn alǵan Qazaqstan Respýblıkasynyń azamattary shengen aýmaǵynan shyǵyp, qaıta kirgen jaǵdaıda kóptegen keleńsiz jaǵdaılarǵa tap bolýda. Ol otandastarymyzdyń Shengen aýmaǵynda bolý kezinde sol memlekettiń ishki vızalyq rejimin, zańyn saqtamaýyna baılanysty. Qazaqstan azamattary «Shengen keńistiginen» shyǵyp, oǵan qaıta kirgisi keletin jaıttar tirkelýde. Osy sebepten Qazaqstan azamattaryn bir mártelik vızalarynyń jaramdylyǵy bitken jaıtta shengen aýmaǵyna sapar shegýge ruqsat etilmeıdi. Shengen vızasymen shengen aýmaǵynyń barlyq memleketterine saıahat jasaýǵa bolatynyn atap ótemiz. Alaıda, eskeretin birneshe qatań shekteýlerge den qoıý asa qajet. Olardyń eń bastysy «alǵash kirý tártibi». Shengen vızasyn kez kelgen konsýldyq qyzmetten alýǵa bolady. Alaıda, ol qaı elge baratynyńyzǵa baılanysty. Eger bir emes, birneshe memleketke jol tartsańyz, qaı memlekette eń kóp turaqtaýdy josparlasańyz, sol eldiń konsýldyq qyzmetine júgingenińiz durys. Sondaı-aq, bir mártelik vızamen Shengen aımaǵyna vızany bergen konsýldyq mekemeniń eli arqyly ǵana kirýge ruqsat etiledi. Sonymen birge, bolý memleketiniń ishki zańnamasyn saqtaý kerektigin eskertemiz. Sebebi, shet elde jasalǵan árbir quqyqbuzýshylyq quqyq qorǵaý organdarynda tirkelip, bolashaqta vıza berýden bas tartýǵa sebep bolady», - delingen nusqaýlyqta.

«Work & Travel in the USA» baǵdarlamasy týraly

«Work and Travel in the USA» baǵdarlamasy   sheteldik stýdentterge jazǵy demalys kezinde AQSh-qa sapar shegip, amerıkandyqtardyń ómirimen tanysýǵa múmkindik beredi. Work and Travel baǵdarlamasyna negizinen keıbir Shyǵys Eýropa elderiniń, Reseı, Ýkraına, Qazaqstan jáne basqa da TMD elderiniń, sondaı-aq Brazılııa, Túrkııa jáne basqa da elderdiń stýdentteri qatysady.  Baǵdarlamanyń qıyndyq týdyratyn eń basty máseleleriniń biri Qazaqstan stýdentteri vızalarynyń merzimi aıaqtalǵannan keıin olardyń AQSh aýmaǵynda qalyp qoıyp, elge qaıtpaýynda bolyp otyr.

«Shetelge alǵash ret shyqqan qazaq stýdentteri Amerıka Qurama Shtattaryna ushyp kelisimen qolaısyz jaǵdaılarǵa dýshar bolýda. Olarǵa rekrýtrlyq kompanııalardyń jetekshileri bergen jadynama arqyly jumysqa ornalasqan jerlerine ózderi barady. Sondaı-aq, AQSh-qa túngi mezgilde ushyp kelgen stýdentter áýejaıda túnep jáne shaqyrýshy jaqtan jumys jaıy bolmaǵannan keıin óz betterinshe jeńil-jelpi jumys taýyp, san alýan kútpegen oqys oqıǵalarǵa kezigýde. Osyǵan baılanysty, atalǵan problemany sheshý maqsatynda, QR SІM Konsýldyq qyzmet departamenti osy baǵdarlama boıynsha shyǵýshy stýdentterge arnalǵan jadynamalar daıyndap, qazirgi ýaqytta AQSh-tyń Astanadaǵy Elshiliginiń jáne Almatydaǵy Bas konsýldyq qyzmetkerlerimen shetelge shyǵatyn qazaqstandyq stýdentterge vıza berer kezde tıisti jadynamalar taratylýda», - delingan taratylǵan baspasóz aıǵaǵynda.