Qazaqstandyqtardyń saıası belsendiligi joǵary - zertteý qorytyndysy

ALMATY. 22 jeltoqsan. QazAqparat /Erbol Azanbek/ - Qazaqstandyqtardyń saıası belsendiligi áleýmettik belsendilikke qaraǵanda 10 paıyzǵa joǵary.

Bul týraly búgin Almatyda Qoǵamdyq problemalardy zertteý ortalyǵynyń (PPRC) uıymdastyrýymen «Qazaqstandaǵy azamattyq qoǵamnyń ındeksi» taqyrybynda ótken semınar barysynda aıtyldy.

«Bul kórsetkish Azamattyq qoǵamnyń ındeksin anyqtaý baǵytyndaǵy zertteý negizinde júzege asyryldy. Azamattyq qoǵamnyń ındeksin anyqtaý qazirgi kezde álemniń 41 elinde júzege asyrylady. Qazaqstan bıyl birinshi ret qatysyp otyr. Indeksti anyqtaýdy júzege asyrý úshin bizde arnaıy keńes berý toby qurylyp, ár aımaq zertteldi»,- deıdi PPRC dırektory Merýert Mahmýtova.

Zertteý kórsetkendeı, qazaqstandyqtar áleýmettik-ekonomıkalyq problemalarǵa belgili bir deńgeıde az kóńil bóledi. Sondaı-aq elimizdegi úkimettik emes uıymdardyń basym bóligi sheshim qabyldaýda demokratııalyq qaǵıdalarǵa júginedi, jartysynan astamy óz deńgeıinde jumys isteýde. «Alaıda bulardyń 14,4 paıyzynyń turaqty adamı resýrstary joq. Bul qarjylyq qamtamasyz etýdiń tómendiginen»,- deıdi M.Mahmýtova.