Qazaqstandyqtardyń Saýd Arabııasyna jáne Taıaý Shyǵys elderine saparlaýdan tartynýy eskertýi jasaldy
ASTANA. QazAqparat - Qazaqstandyqtarǵa Saýd Arabııasyna jáne Taıaý Shyǵys elderine saparlaýdan tartyný týraly usynys jasaldy. Bundaı usynysty búgin Ortalyq kommýnıkatsııalar qyzmetindegi brıfıngte QR Tutynýshylardyń quqyqtaryn qorǵaý agenttigi tóraǵasynyń orynbasary - Qazaqstannyń bas sanıtarlyq dárigeri Jandarbek Bekshın aıtty.
«Saýd Arabııasy Koroldigi, Taıaý Shyǵys elderine barýdan tartynýdy nemese bul elderge saparlardy qatty qajet bolǵan jaǵdaıda ǵana jasaýdy usyndyq», - dedi J.Bekshın.
Bul qaýipsizdik sharalary atalǵan elderdegi pnevmokokk ınfektsııasy, koronavırýs indeti oshaqtarynyń paıda bolýyna baılanysty bolyp otyr. Onyń sózine qaraǵanda, Saýd Arabııasy Koroldiginiń densaýlyq saqtaý mınıstrligi asqynǵan derti bar jáne ımmýnıteti tómen adamdardyń saparyna eskertý jasady.
«Búginde 700-ge jýyq oqıǵa tirkelip, onyń ishinde 280-inde adamdar qaza boldy. Osynyń negizgi úlesi Saýd Arabııasy Koroldigine tıesili. Jalpy búginde koronavırýs on jeti memlekette tirkeldi», - dedi J.Bekshın.
Sonymen qatar ol atalǵan elge qajylyqqa baratyn adamdarda pnevmokokk ınfektsııasyna qarsy vaktsına egilgendigin rastaıtyn sertıfıkat bolýy qajet ekenin aıtty.
Aıta keteıik, pnevmokokk - jedel pnevmonııanyń qozdyrǵyshy (ásirese, kishkentaı balalar men qarttarda). Qanǵa túsken jaǵdaıda qozdyrǵysh mı qabyqtarynyń, ókpeniń, býynnyń jáne taǵy basqa aǵzalardyń irińdi qabynýyna alyp keledi. Balalarda jıi kezdesetin klınıkalyq túrleri - jedel orta otıt (60 paıyzǵa deıin), pnevmonııa (65-80 paıyzǵa deıin) jáne menıngıt (5-20 paıyz).
Dúnıejúzilik densaýlyq saqtaý uıymynyń derekteri boıynsha, álemde pnevmokokk ınfektsııasynan paıda bolatyn syrqattardan jylyna 1,6 mln.-nan astam adam qaıtys bolady. Sonyń ishinde 1 mln.-ǵa jýyǵy - 5 jasqa tolmaǵan balalar. Al 1 jasqa tolmaǵan balalardyń shetineý úlesi 40 paıyzdy qurap otyr.
