Qazaqstandyqtardyń salyqty qate tóleý faktileri 2,5 mıllıonnan 800 myńǵa azaıdy

ASTANA. QazAqparat - Búgin Úkimet otyrysynda Premer-Mınıstr Baqytjan Saǵyntaev tsıfrlandyrý salasy boıynsha tapsyrmalar júktedi, dep habarlaıdy QazAqparat tilshisi.

«Jalpy, qarjy sektoryn tsıfrlandyrý boıynsha barynsha aýqymdy jumystar júrgizilip jatyr. Degenmen de «Tsıfrlyq Qazaqstan» memlekettik baǵdarlamasyn iske asyrý boıynsha jol kartasynda kózdelgen barlyq sharalardy ýaqytyly oryndaýdy qamtamasyz etip, josparlanǵan maqsattar men ındıkatorlarǵa qol jetkizý qajet. Asqar Qýanyshuly (Premer-Mınıstrdiń birinshi orynbasary - avt.), bul baǵyttaǵy jumystardy baqylaýda ustańyz», - dep tapsyrdy Úkimet basshysy.

QR Qarjy mınıstri Baqyt Sultanovtyń málimetine qaraǵanda, mınıstrlik 2017 jyly 18 mln qyzmettiń shamamen 16 mıllıonyn nemese 88 paıyzyn elektrondyq túrde kórsetti. 

«Aǵymdaǵy jyldyń aıaǵyna deıin 6 memlekettik qyzmetti elektrondyq formatqa kóshirýdi, 25 memlekettik qyzmet boıynsha kórsetý merzimin jáne usynylatyn qujattar tizbesin qysqartýdy josparlap otyrmyz. Elektrondyq salyqtyq deklaratsııalardy veb-portalǵa jáne «elektrondyq úkimet» mobıldik baǵdarlamalaryna aýdarý jumystary júrgizilip jatyr. Nátıjesinde, elektrondyq túrde kórsetilgen qyzmetterdiń úlesi 95 paıyzǵa deıin jetkizilmek. Salyqtyq eseptilik tapsyrý, aktsız markasy men fıskaldyq chekti tekserý sııaqty servısterge IT-kompanııalardyń óz qosymshalary men servısterin ázirleýi úshin ashyq ınterfeıs (Application programming interface) túrinde qoljetimdi bolady», - dep naqtylady B. Sultanov.

Sonymen qatar mınıstrdiń aıtýynsha, «Ortalyqtandyrylǵan biregeılendirilgen derbes shot» júıesiniń engizilýimen, salyq beresheginiń bar/joǵy týraly anyqtama berý qyzmetin kórsetý ýaqyty 3 kúnnen birneshe mınýtqa deıin qysqardy. Jyl saıyn osyndaı 5 mıllıonnan astam anyqtama beriledi eken.

«Derbes shottardy ortalyqtandyrý arqasynda salyqty qate tóleý jaǵdaılary 3 esege azaıdy (2,5 mln.-nan 800 myńǵa deıin), bul negizsiz ósimpul esepteýdi boldyrmaýǵa alyp keldi. Sondaı-aq salyq tóleýshiniń ótinishinsiz bir salyqtan basqa salyqqa avtomatty túrde esepke jatqyzý múmkindigi paıda boldy», - dedi Qarjy mınıstri.

Onyń sózinshe, kelesi negizgi mindetterdiń biri - ol bıýdjettik josparlaý protsesin ońtaılandyrý jáne avtomattandyrý.

Qazirgi tańda bul jumys is júzinde qaǵaz tasyǵyshta júzege asyrylady. Bul derekterdi jınaý merzimin, bıýdjetti kelisý men ony bekitý merzimderin de  uzaqqa sozyp jiberedi. Avtomattandyrý bıýdjettik ótinimdi qalyptastyrýǵa shyǵystardy (qaǵaz, keńse taýarlary, issapar shyǵystary, poshta qyzmetteri) 70 paıyzǵa, al kelisý merzimderin 4 esege (80-nen 20 kúnge deıin) qysqartady.

Budan ári bıýdjettik jáne strategııalyq josparlaý protsesterin ıntegratsııalaý iske asyrylatyn bolady.