Qazaqstandyqtardyń salyq qaryzy 24,3 mlrd teńgege jetti

NUR-SULTAN. QazAqparat - Respýblıka boıynsha búginde jeke tulǵalardyń múlik salyǵy, jer salyǵy jáne kólik quraldary salyǵy boıynsha bereshegi 919 myń salyq tóleýshi boıynsha 24,3 mlrd teńgeni qurady, onyń ishinde bereshektiń negizgi somasy kólik quraldary salyǵyna tıesili – 22,8 mlrd. teńge. Bul týraly QR QM Memlekettik kirister komıteti habarlady.

Olardyń ishinde kólik quraldary salyǵy boıynsha salyq mindettemelerinen jaltarǵan avtokólik ıeleriniń eń kóp sany kelesi óńirlerde tirkelgen:

​Almaty qalasynda - 88 myń boryshker boıynsha bereshek 5,2 mlrd. teńgeni quraıdy;

Almaty oblysy - 132 myń boryshker boıynsha bereshek 3,9 mlrd. teńgeni quraıdy;

Nur-Sultan jáne Shymkent qalalarynda – tıisinshe 2,6 mlrd. teńge jáne 1,9 mlrd. teńge bereshegi bar 76 myń boryshkerden.

2021 jylǵa jeke tulǵalardyń kólik quraldaryna salyq tóleý merzimi 2022 jylǵy 1 sáýirde aıaqtalǵanyn eske salamyz.

2022 jylǵy 17 mamyrdan bastap salyq somasyn ýaqtyly tólemegen tulǵalarǵa 1 AEK-ten joǵary bereshek somalary boıynsha jeke tulǵanyń bereshegin óndirip alý týraly salyq buıryqtaryn joldaý bastaldy.

Bereshek tólenbegen jaǵdaıda salyq buıryǵy tabys etilgen kúnnen keıin 5 jumys kúni ótken soń, jeke sot oryndaýshylarynyń óńirlik palatasyna májbúrlep oryndatýǵa jiberiledi. Óz kezeginde, jeke sot oryndaýshylary «Atqarýshylyq is júrgizý jáne sot oryndaýshylarynyń mártebesi týraly « Qazaqstan Respýblıkasynyń Zańyna sáıkes bank shottary men múlkine tyıym salý túrinde májbúrlep óndirip alý sharalaryn qoldanýǵa quqyǵy bar.

Eger qaryz 40 AEK-ten assa, azamatqa elden shyǵýǵa tyıym salynýy múmkin. QR shyǵýǵa tyıym salý týraly aqparatty silteme arqyly bilýge bolady https://aisoip.adilet.gov.kz/debtors.

Jazǵy kanıkýl jáne demalys maýsymy kezinde jaǵymsyz saldarlardy boldyrmaý úshin Komıtet salyq bereshegi bolǵan jaǵdaıda ýaqytyly tólem júrgizýdi usynady. Salyq boıynsha bereshektiń bar/joq ekendigi týraly málimetterdi e-Salyq Azamat mobıldi qosymshasynyń qoıyndysy Elektrondy servıster→Salyq jáne áleýmettik tólemder boıynsha bereshek týraly qyzmeti→JSN-dy engizý arqyly tekserýge bolady. E-Salyq Azamat mobıldi qosymshasyn silteme arqyly ornatýǵa bolady.