Qazaqstandyqtardyń salyq qaryzy 23 mlrd teńgege jetti

NUR-SULTAN. QazAqparat - 2021 jyldyń birinshi jartyjyldyǵynyń qorytyndysy boıynsha jeke menshiktegi múlik boıynsha salyq beresheginiń somasy 23 mlrd teńge boldy, dep habarlaıdy QazAqparat Memlekettik kirister komıtetine silteme jasap.

Vedomstvonyń málimetinshe, elimizde kólik salyǵy boıynsha jalpy bereshek somasy 21,5 mlrd teńge, onyń ishinde negizgi somasy 17,5 mlrd teńge, ósimpuly - 3,9 mlrd teńgege jetken.

263 802 jeke tulǵanyń múlik salyǵy boıynsha bereshegi 1,1 mlrd teńge, onyń ishinde negizgi somasy 877,1 mln teńge, ósimpuly - 269,9 mln teńge.

Sonymen qatar, 261 801 jeke tulǵanyń jer salyǵy boıynsha qaryzy 409,5 mln teńge, onyń ishinde negizgi somasy 282,7 mln ​​teńge, ósimpuly - 126,8 mln teńge.

Komıtettiń túsindirýinshe, salyq zańnamasy boıynsha salyq mindettemesiniń oryndalýyn keshiktirgen árbir kún úshin ósimpul esepteledi, al aıyppuldardy qoldaný zańda kózdelmegen.

«Sonymen qatar, salyq mindettemesi oryndalmaǵan nemese tıisinshe oryndalmaǵan jaǵdaıda, salyq organdary salyq bereshegin májbúrlep óndirip alýdy qamtamasyz etý úshin salyq zańnamasynda kózdelgen ádisterdi qoldanýǵa mindetti.

Bul rette salyq zańnamasy bankterdiń salyq bereshegi, áleýmettik tólemder boıynsha bereshegi bar salyq tóleýshige (zańdy tulǵa, jeke kásipker, jeke tulǵa) banktik shot ashýdan bas tartý mindettemesin kózdeıdi», delingen habarlamada.

Bul ereje memlekettik bıýdjetten jáne Memlekettik áleýmettik saqtandyrý qorynan tólenetin járdemaqylar men áleýmettik tólemderdi alýǵa arnalǵan bank shottaryna, bilim berý jınaq salymy sharty boıynsha bank shottaryna qoldanylmaıdy. ıAǵnı, eger bank shoty jeke tulǵa osy maqsattar úshin ashsa, onda mundaı adamnyń salyq bereshegi bolsa da, bank ony ashýdan bas tartýǵa quqyly emes.

«Budan basqa, Salyq kodeksine sáıkes salyq bereshegi 1 aılyq eseptik kórsetkishten artyq mólsherde tólenbegen jaǵdaıda, salyq bereshegi týraly habarlama berilgen kúnnen bastap otyz jumys kúni ishinde tólenbegen jaǵdaıda salyq organy sáıkes salyq buıryǵyn shyǵarady jáne ony Qazaqstan Respýblıkasynyń atqarýshylyq is júrgizý jáne onyń mártebesi týraly zańnamasynda belgilengen tártippen aımaqtyq jeke sot oryndaýshylar palatasyna nemese ádilet organdaryna májbúrlep oryndaý úshin jiberedi», delingen habarlamada.