Qazaqstandyqtardyń ortasha jalaqysy 158,2 myń teńge boldy
ASTANA. QazAqparat - QR Ulttyq ekonomıka mınıstri Tımýr Súleımenov 2018 jyldyń qańtar-qyrkúıek aılaryndaǵy ortasha jalaqy kólemin atady, dep habarlaıdy QazAqparat tilshisi.
Mınıstrdiń aıtýynsha, jyl basynan beri 414,5 myń adam jumysqa ornalasqan jáne qazan aıynda jumyssyzdyq deńgeıi 4,8% deıin tómendegen.
«Jalaqy bir qalypty qarqynmen ósýde. Bıylǵy qańtar-qyrkúıekte ortasha aılyq jalaqy 158,2 myń teńgege deıin ulǵaıdy. Jalaqynyń ósýi jáne ınflıatsııalyq protsessterdiń báseńdeýi aıasynda naqty aqshalaı tabys bıylǵy qańtar-tamyzda 3,5%-ke ósti», - dep atap ótti Tımýr Súleımenov búgingi Úkimet otyrysynda.
Degenmen, halyqtyń tabysy boıynsha óńirlerde túrli kórsetkishter baıqalǵan.
«Bıylǵy qańtar-maýsym aılarynda 17 óńirdiń 13-inde naqty tabystardyń ósýi baıqalyp otyr. Sonymen birge, 4 óńirde naqty tabystar azaıǵan. Olar - Mańǵystaý (-4,5%), Qyzylorda (-2,6%), Almaty (-0,4%) oblystary jáne Almaty qalasy (-0,6%)», - dedi T. Súleımenov.
