Qazaqstandyqtardyń onlaın sanaqqa qatysýy eýropalyq kórsetkishpen teńesti

NUR-SULTAN. QazAqparat – Ulttyq statıstıka bıýrosynyń basshysy Nurbolat Aıdapkelov Úkimette Ulttyq halyq sanaǵynyń qorytyndysyn baıandady, dep habarlaıdy QazAqparat tilshisi.

«Qazaqstan Respýblıkasynyń Ulttyq halyq sanaǵy aıaqtaldy. Sanaq el turǵyndarynyń barlyq sanattaryn qamtydy. Onlaın saýalnamadan halyqtyń 42,5% ótti, al jappaı aralap shyǵý arqyly 57,5% adam sanaqpen qamtyldy. Kórip otyrǵandaryńyzdaı, el turǵyndary onlaın formattaǵy halyq sanaǵynan ótýge belsene qatysty. Bul kórsetkish onlaın formatta sanaqtan ótýdiń ortasha eýropalyq kórsetkishine jaqyndaǵanyn atap ótý qajet», - dedi N. Aıdapkelov Úkimettiń búgingi otyrysynda.

Onyń aıtýynsha, halyq sanaǵyna 25 myńǵa jýyq sanaq personaly jáne aýmaqtyq bólimshelerdiń jáne bıýronyń ortalyq apparatynyń qyzmetkerleri tartyldy.

«Halyq sanaǵyn ótkizýdiń uıymdastyrýshylyq jáne problemalyq máselelerin respýblıkalyq deńgeıde QR arnaıy komıssııa sheshti. Osyndaı óńirlik komıssııalardy oblystardyń jáne respýblıkalyq mańyzy bar qalalardyń ákimderi, al aýdandyq deńgeıde aýdan ákimderi basqardy. Sanaqty ótkizý máseleleri apta saıyn Úkimettiń, Úkimettiń tsıfrlyq ofısiniń jáne Arnaıy komıssııanyń otyrystarynda qaralyp otyrdy», - dedi N. Aıdapkelov.