Qazaqstandyqtardyń ómir súrý jasy uzardy
ASTANA. QazAqparat - Sońǵy 10 jylda Qazaqstanda ólim-jitim kórsetkishi azaıyp, ómir súrý uzaqtyǵy 6 jylǵa uzarǵan, dep habarlaıdy QazAqparat tilshisi.
Bul týraly QR Densaýlyq saqtaý mınıstrligi Medıtsınalyq kómekti uıymdastyrý departamentiniń dırektory Laýra Ahmetnııazova málim etti.
«Sońǵy jyldary densaýlyq saqtaý júıesiniń qyzmeti eldegi demografııalyq jaǵdaıǵa yqpal etetin aýrýlardyń aldyn alýǵa, olardy erte anyqtaýǵa jáne tıimdi emdeýge basymdyq bergen bolatyn. Atap aıtqanda, qan aınalymy júıeleriniń buzylýy, onkologııalyq aýrýlar, jaraqattar, ana men bala kútimi jáne t.b. Bul baǵytta memleket atqarǵan, atqaryp jatqan jáne bolashaqta da atqaratyn sharalar kesheni óz nátıjelerin bere bastady», - dep atap ótti L. Ahmetnııazova Ortalyq kommýnıkatsııalar qyzmetinde ótken Dúnıejúzilik densaýlyq saqtaý kúnine arnalǵan baspasóz máslıhatynda.
Onyń aıtýynsha, sońǵy 10 jylda Qazaqstanda ómir súrý uzaqtyǵy 6 jylǵa uzarǵan. 2016 jyldyń qorytyndysyna sáıkes, qazaqstandyqtardyń ómir súrý uzaqtyǵy 72,3 jylǵa jetken.
«Qazaqstandaǵy ólim-jitim kórsetkishi 27 protsentke azaıyp, ana ólimi - 4 esege, bala ólimi - 1,6 esege tómendegen. Sonymen birge, qan aınalym júıesi, týberkýlez, onkologııa syndy áleýmettik mańyzy bar aýrýlardan bolatyn ólim kórsetkishi de azaıǵan. Aldymyzda medıtsınalyq qyzmettiń qoljetimdi etý, onyń sapasyn jaqsartý mindetteri tur. Bul maqsatta bastapqy medıtsınalyq-sanıtarlyq kómekte tirkeý bóliminiń jumysyn jetildiremiz. Eresekterge, balalarǵa jáne qarttarǵa jeke-jeke tirkeý bólimderin ashamyz», - dep óz sózin tolyqtyrdy L. Ahmetnııazova.
Eske sala ketsek, 7 sáýir kúni Qazaqstanda Dúnıejúzilik densaýlyq saqtaý kúni atalyp ótedi. Bul kúni elimizdiń barlyq medıtsınalyq uıymdarynda ashyq esik kúni uıymdastyrylady jáne kez kelgen nıet bildirýshi tegin tekserýden ótip, arnaıy mamandardan konsýltatsııalyq kómek ala alady.
