Qazaqstandyqtardyń ómir súrý jasy uzardy - Densaýlyq saqtaý mınıstri S. Qaıyrbekova
ALMATY. 26 qarasha. QazAqparat /Ádilet Musahaev/- Sońǵy úsh jylda qazaqstandyqtardyń ómir súrý jasynyń uzaqtyǵy 2,3 jylǵa ósken. Bul jaıynda búgin QR Densaýlyq saqtaý mınıstri Salıdat Qaıyrbekova Almatyda ótip jatqan «Salaýatty ulttyń jarqyn bolashaǵy» atty forýmda aıtty.
Sonymen qatar ol halyqtyń tabıǵı ósiminiń, týý men ólimi sııaqty negizgi medıko-demografııalyq kórsetkishteriniń turaqtanǵandyǵyn aıtyp ótti. Buǵan salaýatty ómir saltyn qalyptastyrý men óz densaýlyǵyna jaýapty kózqaras boıynsha halyqpen jumysta halyqaralyq tehnologııalardy zertteý men engizý yqpal etken.
Dúnıejúzilik densaýlyq saqtaý uıymynyń derekterine sáıkes, adam densaýlyǵynyń 50 paıyzy ómir súrý saltyna táýeldi, bul qorshaǵan ortanyń, ómir sapasynyń jáne densaýlyqty jaqsartý múmkindikterine qol jetimdik áserinen qalyptasady. «Ólimniń eń kóp úlesi (86%) men aýrýlar aýyrtpalyǵy (77%) ınfektsııalyq emes sozylmaly aýrýlardan týyndaıdy, bulardyń negizinde shylym shegý, alkogoldi tym kóp mólsherde ishý, durys tamaqtanbaý, deneshynyqtyrýmen aınalyspaý sııaqty qaýip-qater faktorlary jatyr», - dep atap ótti óz sózinde S.Qaıyrbekova.
S.Qaıyrbekova sondaı-aq densaýlyq saqtaý salasynyń taǵy bir jetken jetistigi - QR «Halyq densaýlyǵy jáne densaýlyq júıesi týraly» Kodekske alkogol men shylym shegýdi retteýge baılanysty engizgen zańnamalyq normatıvtik aktilerdiń mańyzy zor ekendigin aıtyp ótti.
