Qazaqstandyqtardyń ómir súrý jasy uzarady - Ajar Ǵınııat

NUR-SULTAN. QazAqparat – 2025 jylǵa qaraı salaýatty ómir saltyn ustanatyn azamattar úlesin 40%-ǵa deıin, ómir súrý uzaqtyǵyn 75 jasqa deıin ulǵaıtý josparlanǵan. Bul týraly QR Densaýlyq saqtaý mınıstri Ajar Ǵınııat aıtty, dep habarlaıdy QazAqparat tilshisi.

«Halyqtyń ómir súrý sapasyn jaqsartý úshin «Deni saý ult» ulttyq jobasy qabyldandy. Onda qoljetimdi jáne sapaly medıtsınalyq kómekti, dári-dármekpen qamtamasyz etý, profılaktıkalyq, onyń ishinde aýyl halqy úshin qarap-tekserý men skrınıngterdi júrgizý, psıhıkalyq jáne reprodýktıvtik densaýlyqty saqtaý qyzmetterin kórsetý úshin jastar densaýlyq ortalyqtarynyń qoljetimdiligi jónindegi sharalar iske asyrylady», - dedi A. Ǵınııat Úkimettiń búgingi otyrysynda.

Sondaı-aq salaýatty ómir saltyn qalyptastyrý, alkogol, temeki ónimderin tutynýdy qysqartý, ınfektsııalyq jáne ınfektsııalyq emes aýrýlardy tómendetý, jaraqattanýdyń aldyn alý jáne salamatty ómir saltyn qalyptastyrý máseleleri boıynsha aqparattyq-túsindirý jumystary júrgiziledi.

«Qabyldanǵan sharalar nátıjesinde 2025 jylǵa qaraı salamatty ómir saltyn ustanatyn azamattar úlesin 40%-ǵa deıin, ómir súrý uzaqtyǵyn 75 jasqa deıin ulǵaıtý, ınfektsııalyq emes aýrýlardy 7%-ǵa deıin tómendetý, medıtsınalyq ońaltý qyzmetterimen 75%-ǵa deıin qamtý kútiledi», - dedi Ajar Ǵınııat.