Qazaqstandyqtardyń ómir súrý uzaqtyǵy 4,4 jylǵa ósti

ASTANA. QazAqparat - Táýelsizdik jyldarynda qazaqstandyqtardyń ómir súrý uzaqtyǵy 4,4 jylǵa ulǵaıyp, 2015 jyldyń nátıjesi boıynsha 72 jasty qurady (1991 jyly bul kórsetkish 67,6 bolatyn).

Bul týraly QR DSÁDM baspasóz qyzmeti habarlady.

Mundaı kórsetkishke QR densaýlyq saqtaý salasyn damytýdyń 2011-2015 jyldarǵa arnalǵan «Salamatty Qazaqstan» jáne Densaýlyq saqtaý salasyn reformalaýdyń 2005-2010 jyldarǵa arnalǵan memlekettik baǵdarlamalaryn sátti júzege asyrý nátıjesinde qol jetkizildi.

Halyqtyń týý kórsetkishi 8,2%-ǵa ósti, ol 2015 jyldyń nátıjesi boıynsha 1000 turǵynǵa shaqqanda 22,72-ni qurady (1991 jyly - 21).

Ana men sábı ólimi sáıkesinshe 5,4 jáne 3 esege tómendedi (1991 jyly ana ólimi - 100 myń tiri týǵanǵa shaqqanda 67,2-den 2015 jyly 12,5-ge deıin, sábı ólimi - 1991 jyly 100 myń tiri týǵandarǵa shaqqanda 27,4-ten 2015 jyly 9,39-ǵa deıin).

Táýelsizdik jyldarynda jalpy ólim-jitim kórsetkishi 6%-ǵa tómendedi (1000 turǵynǵa shaqqanda 1991 jyly 8-den 2015 jyly 7,52-ge deıin). Bul kórsetkish negizgi sebepterden týyndaıtyn ólim-jitimdi azaıtý arqyly júzege asty: qan aınalymy júıesinen bolatyn ólim 1,9 esege (1991 jyly 100 myń turǵynǵa shaqqanda 361-den 2015 jyly 193,8-ge deıin), qaterli isik aýrýlarynan 33%-ǵa (1991 jyly 100 myń turǵynǵa shaqqanda 137,4-ten 2015 jyly 92-ge deıin), qaıǵyly oqıǵalar saldarynan, jaraqattaný men ýlanýdan 23,1%-ǵa (1991 jyly 100 myń turǵynǵa shaqqanda 107,3-ten 2015 jyly 82,5-ke deıin) tómendedi.

Esterińizge sala keteıik, 2020 jylǵa deıin ómir súrý uzaqtyǵyn 73 jasqa deıin ulǵaıtý - «Densaýlyq» baǵdarlamasynyń maqsatty ındıkatory bolyp tabylady.