Qazaqstandyqtardyń kompıýterlik saýattylyǵy 64 paıyzdy quraıdy
ASTANA. QazAqparat - Qazaqstandyqtardyń kompıýterlik saýattylyǵy 64 paıyzdy quraıdy. Búgin Senattyń jalpy otyrysynda Investıtsııalar jáne damý mınıstri Áset Isekeshev málim etti.
Eske sala keteıik, jıynda «Aqparattandyrý týraly» QR Zańy qabyldanǵan bolatyn.
Qujat aqparattandyrý, memlekettik fýnktsııalar men kórsetiletin qyzmetterdi avtomattandyrý, aqparattyq-kommýnıkatsııalyq ınfraqurylymdy qorǵaý, aqparattyq-kommýnıkatsııalyq tehnologııalar salasynyń damýyn memlekettik qoldaý salasyndaǵy zańnamany jetildirýdi kózdeıdi.
Mınıstrdiń sózine qaraǵanda, qujat qazaqstandyq qoǵamdy aqparattandyrýdy zamanaýı halyqaralyq standarttarǵa jaýap beretin uıymdastyrýdyń tıimdi júıesin engizý jolymen odan ári qamtamasyz etedi.
«Budan bólek, «ashyq úkimet» qurý, halyq arasynda sandyq tehnologııaǵa saýattylyqty arttyrý qarastyrylady. Bul rette aıta keterligi, 2014 jyly qazaqstandyqtardyń kompıýterlik saýattylyǵy 64 paıyzdy qurady. Sonymen qatar, zań jobasymen «mobıldik táýeldilikti» boldyrmaý qarastyrylyp otyr. «Qylmystyq quqyq buzýshylyq kartasy» ınternet-portalyn qurý da kózdeledi, onda elimizde jasalǵan barlyq quqyq buzýshylyqtar qamtylady», - dedi Áset Isekeshev.
Onyń aıtýynsha, zań jobasyn qabyldaý bıýdjettik shyǵystardy edáýir qysqartýǵa óz septigin tıgizedi. Memlekettik fýnktsııalar men qyzmetter kórsetýdi avtomattandyrý nátıjesinde ony kórsetý eki esege qysqarady. Bul rette málimetter bazasyn saqtaýdyń zamanaýı tehnologııalary qoldanylady.
«Tutastaı alǵanda, zań kúshine engennen soń barlyq memlekettik organdar quzyretine halyqtyń «sandyq tehnologııalarǵa qatysty saýattylyǵyn arttyrý» jumystary da kiredi. ıAǵnı, bul bizdiń jalpymemlekettik isimizge aınalady», - dedi Á. Isekeshev.
