«Qazaqstandyqtardyń kóbi KVI-diń jeńil túrimen aýyryp bolǵany» ras pa – Tsoıdyń jaýaby

NUR-SULTAN. QazAqparat – «Qazaqstandyqtardyń kóbi KVI-diń jeńil túrimen aýyryp boldy» degen syńaıda qoǵamda pikir bar. «Bul boljam ras pa?» degen suraq OKQ-da ótken baspasóz máslıhaty barysynda Densaýlyq saqtaý mınıstri Alekseı Tsoıǵa qoıyldy, dep habarlaıdy QazAqparat tilshisi.

«Biz jumysymyzda ózimizdiń resmı málimetterimizge súıenemiz. Álbette qoǵamda kóp adamnyń koronavırýspen aýyryp, jazylyp ketti degen syńaıda pikir baryn bilemin. Sebebi koronavırýs ınfektsııasy boıynsha sımptomatıka JRVI belgilerine, ásirese pnevmonııaǵa óte uqsas ekenin túsiný kerek. Mundaı qorqynysh bar. Qazir qolymyzdaǵy statıstıkalyq málimetter – testtermen rastalǵan jaǵdaılar. Sonymen qatar aýqymdy zertteý jumystary júrgizilip jatyr. Jaqyn arada onyń nátıjesi shyǵady», - dedi mınıstr.

Alekseı Tsoıdyń aıtýynsha, pnevmonııa men koronavırýs ınfektsııasyn juqtyrǵan patsıentterdiń mıkrobty peızajy jasalady. Osydan keıin koronavırýs ınfektsııasymen kúrestiń baǵyt-baǵdary aıqyndalmaq.

Eske sala ketsek, búgin QR Premer-Mınıstri Asqar Mamınniń tóraǵalyǵymen ótken Memlekettik komıssııa otyrysynda QR Prezıdenti Qasym-Jomart Toqaevtyń tapsyrmasyna sáıkes Qazaqstandaǵy epıdemıologııalyq ahýaldy turaqtandyrý sharalary qaralǵan bolatyn. Memlekettik komıssııanyń sheshimimen 5 shildeden bastap 14 kúnge qatań shekteý sharalaryn engizetin boldy.