Qazaqstandyqtardyń el taǵdyryn Prezıdentke senip tapsyrýynda onyń aýyr eńbekte shyńdalyp, partııa, úkimet qyzmetterinde synnan ótkeni úlken ról atqardy - A. Esimov
Bul týraly Almaty qalasynyń ákimi Ahmetjan Esimov búgin QR Tuńǵysh Prezıdenti kúnine oraı Respýblıka saraıynda ótken saltanatty jıynda aıtty.
«Álemdik órkenıettiń shyńyna umtylǵan Qazaqstan táýelsiz memleket retinde tarıhı da jasampaz jańa dáýirge qadam basqanyna bıyl 22 jyl tolady. Osynaý syndarly kezeńde, tar jol taıǵaq keshýden aman-esen alyp shyqqan Elbasymyz az ǵana ýaqyttyń ishinde memleketimizdiń qaryshtap damýyna, táýelsizdik tuǵyrynyń nyǵaıýyna, halyqtyń ál-aýqatynyń artýyna sińirgen eńbegi zor. Búginde Qazaqstannyń shańyraǵy berik, mereıi ústem, bedeli asqaq», - dedi A.Esimov. Shahar basshysynyń aıtýynsha, táýelsizdik tarıhynyń alǵashqy betindegi Prezıdent saılaýy jańa memlekettiń qalyptasýynyń ótpeli kezeńinde senimdi basshyǵa óz taǵdyryn tapsyrǵan Qazaqstan halqynyń jaýapty tańdaýy boldy. Osy oraıda erekshe aıta ketetin jaıt, Qazaqstan halqy óziniń jańa kóshbasshysynyń qarapaıym adamdar ortasynan shyqqanyn, Qaraǵandy metallýrgııalyq kombınatynda aýyr eńbekte shyńdalyp, partııa, úkimet qyzmetterinde synnan ótkenin jaqsy biletindigi. Bul el taǵdyryn Prezıdentke senip tapsyrýda úlken ról atqardy.
