Qazaqstandyqtardyń dollarǵa suranysy azaıyp barady
ASTANA. QazAqparat - Qazaqstandyq valıýta aıyrbastaý oryndarynda netto saýda kólemi 2018 jyldyń qańtar-naýryzynda 58,2 mlrd teńgege jetti. ıAǵnı atalmysh kórsetkish ótken jyldyń sáıkes merzimindegi 107,9 mlrd teńgeden 46 protsentke azaıdy, dep habarlaıdy QazAqparat ranking.kz. saıtyna silteme jasap.
Qazaqstandyqtar aqsha aıyrbastaý oryndarynda dollardy ótkizgennen góri kóbirek satyp alyp jatqanyna qaramastan, amerıkalyq valıýta túrine degen suranys kún saıyn kemip barady, deıdi zertteýshiler.
Mysal keltiretin bolsaq, bıylǵy jyldyń aqpan aıynda nettto-saýda kólemi aqpan aıymen salystyrǵanda 36 paıyzǵa kemidi, naýryzda taǵy 15 paıyzǵa azaıdy. Qarjylaı alǵanda amerıkalyq valıýtadaǵy netto-saýda kólemi 68,7 mlrd teńgeni qurady.
2018 jyldyń naýryzynda elimizdiń 16 óńiriniń ekeýinde qazaqstandyqtardyń aqsha aıyrbastaý oryndaryna dollardy satyp alýyna qaraǵanda tapsyrýy kóp bolǵan. Al qańtar men aqpanda dollarmen jasalǵan netto-saýda kólemi eldiń barlyq óńirinde kóp boldy.
Osy aıda netto-saýda kólemi boıynsha 29,8 mlrd teńgemen Almaty qalasy kósh bastap otyr. Bul el boıynsha jasalǵan saýda kóleminiń jartysynan astamy. Odan keıingi orynda 7,2 mlrd teńgemen Ońtústik Qazaqstan oblysy tur. Úshinshi orynda 5,3 mlrd teńgemen Mańǵystaý oblysy turaqtaǵan.
2018 jyly dollardy ortasha aılyq kórsetkishi úsh aı qatarynan kemip keeldi. Aıtalyq qańtar aıynda 1 AQSh dollarynyń quny teńgege shaqqanda 327 teńge bolsa, aqpanda 321,9, naýryzda 320,7 teńge boldy.
2017 jyly qazaqstandyqtar aqsha aıyrbastaý oryndarynan 10,6 mlrd AQSh dollaryn satyp alyp, 5,9 mlrd dollardy ótkizgen. Netto-saýda kólemi 4,7 mlrd dollardy qurady. Bul rette dollarǵa degen suranystyń sharyqtaý shegi tamyz-qazan aılary aralyǵyna kelgendigin aıta ketý kerek. Netto-saýda tamyzda 876,7 mln dollar bolsa, qyrkúıekte 555,4 mln, qazanda 598,3 mln dollar boldy. Sáýirde osy kórsetkish 88,4 mln dollardy qurady.
Ótken jyly AQSh dollarynyń eń joǵarǵy kórsetkishi qyrkúıek aıyna keldi. Ol kezde dollardyń ortasha aılyq quny teńgege shaqqanda 339,2 teńgeni qurady. Eń tómengi kórsetkish sáýirde tirkelip, 1 dollardyń teńgege shaqqandaǵy baǵasy 312,2 teńge boldy.
