Qazaqstandyqtardyń Dımashqa bergen daýystary onyń baıqaýdaǵy reıtıngine áser etpeıdi

ASTANA.QazAqparat - Qazaqstandaǵy Facebook jáne Whatsapp áleýmettik jelileri arqyly Qytaı baıqaýynda óner kórsetip jatqan Dımashqa daýys berý týraly habarlamalar taratylýda, dep habarlaıdy QazAqparat.

Atap aıtqanda, Whatsapp  jelisinde «Dımashqa daýys berý  bastaldy, myna qytaı jazýyn bassańyz, Dımashtyń fotosy 1-inshi bolyp tur. Qyzǵylt saryny basqanda, ol qońyrǵa aınalýy kerek. Daýys berý búgin, qazir bastaldy. Bizdiń bala ázirge birinshi bolyp keledi. Allaǵa amanat! Barlyǵyna osyny tezdetip salarsyzdar! Alǵa, Qazaqstan!!!», - degen habarlama taratylýda.

Sondaı-aq, Facebook áleýmettik jelisinde Dımash Qudaıbergen úshin daýys berýdi surap, memlekettik qyzmetkerlerimiz de posttar jazýda. «Dımash Qudaıbergenov úshin daýys berýińizdi ótinemin. Ol daýystar boıynsha birinshi bolyp kele jatyr, Daıdıdaý óleńi. Qyzǵylt sary tetikti basý qajet. Bizdiń juldyzymyzdy qoldaıyq. Repost quptalady!», - dep jazǵan olar, qytaılyq saıttyń siltemesimen bólisken.





Siltemeni basyp kórgen  QazAqparat tilshisi máseleniń jaı-japsaryn túsinýge tyrysqan bolatyn. Shyndyǵynda, qazaqstandyqtardan suralyp otyrǵan daýys berý «Singer 2017» baıqaýynyń 7-kezeń qatysýshylaryna arnalǵan saýalnama. Ony atalmysh baıqaýdy tikeleı jáne ınternette kórsetýge ruqsaty bar úsh vıdeo-hostıngtiń biri - qytaılyq 爱奇艺 (iqiyi.com) ornalastyrǵan bolyp shyqty. Bul saýalnama ónerpazdardyń baıqaýdaǵy upaılaryna esh áser etpeıdi. Biraq, aıta keteıik, jankúıerlerdiń qoldaýymen Dımash atalmysh vıdeo-hostıngte 530 myń daýys jınap, birinshi orynda tur. 

Jobanyń baǵalaý talaptaryna sáıkes , qatysýshynyń taǵdyryn túsirilim barysynda zalda otyrǵan 500 tyńdarman sheshedi. Olar daýys berý arqyly sol kezeńdegi eń úzdik ánshini tańdap, eń az upaı jınaǵan bir qatysýshyny baıqaýdan shyǵaryp otyrady. Ár aınalymnyń qorytyndysy boıynsha, 1-orynnan 7-orynǵa deıin reıtıng qurylyp, jobadan shyǵyp qalǵan 7-oryndaǵy ánshiniń ornyna jańa ánshi qosylady.

Aıta keteıik, «Singer 2017» baıqaýynyń jetinshi kezeńi 4 naýryz kúni efırde kórsetildi. Dımash qazaqtyń «Daıdıdaý» ánin oryndap , úshinshi oryn alǵany týraly habarlaǵan edik. Onyń qytaısha «Tań atty» ánin oryndaǵan segizinshi kezeń - 11 naýryzda,  álemdik hıt «All by Myself»-ti oryndaǵan toǵyzynshy kezeń 18 naýryzda kórsetiledi.

Eske sala keteıik, Dımash Qudaıbergen baıqaýdyń toǵyz kezeńinde óner kórsetip úlgerdi. Fınalǵa tek bir kezeń qaldy.