Qazaqstandyqtardyń depozıti qorǵaýǵa alynǵan - Kepildik berý qory
ALMATY. QazAqparat - Zańda belgilengen shekke saı, qazaqstandyqtardyń ıeligindegi shottardyń 100%-y Qazaqstannyń depozıtterge kepildik berý qorynyń kepildiginde tur. Bul rette qazaqstandyq bankterdegi depozıttik shottardyń 99,8%-y tolyq kólemde kepildikpen qorǵalǵan, dep habarlaıdy QazAqparat tilshisi.
«2022 jyly qańtarda teńgelik jınaq salymdar boıynsha kepildik berilgen maksımaldy ótem somasy 15 mln teńgeden 20 mln teńgege deıin ulǵaıtyldy. Sondaı-aq bir bankte jınaq salymynan basqa depozıtterdiń nemese shetel valıýtasynda depozıtiniń basqa túri bar salymshylarǵa ótemaqynyń jalpy somasy 20 mln teńgege deıin kóbeıtildi.
Teńgelik depozıtterdiń anaǵurlym ıkemdi túrleri, atap aıtqanda, merzimdi jáne merzimsiz salymdar, aǵymdaǵy shottar men tólem kartochkalaryndaǵy aqshalar, sondaı-aq shartty salymdar men talap etilmeli salymdar boıynsha 10 mln teńgege deıin kepildik berilgen»,- dep habarlady Qordyń baspasóz qyzmeti.
Shetel valıýtasyndaǵy depozıtterdiń kez kelgen túri boıynsha kepildik berilgen maksımaldy ótem somasy – valıýta balamasynda 5 mln teńge.
Birneshe bankte ornalasqan depozıtter jeke-jeke kepildendiriledi. Bir bankte depozıtterdiń birneshe túri men valıýtasy bar, sonyń ishinde teńgedegi jınaq salymy bar iri salymshylar úshin Qordyń jalpy eń joǵary kepildigi (depozıttiń árbir túri úshin jeke belgilengen kepildik ótemaqynyń eń joǵary mólsheri sheginde) 20 mln teńge»,- delingen habarlamada.
Qazirgi ýaqytta eki ıslam bankin eseptemegende, elimizdiń depozıtterge kepildik berý júıesine qazaqstandyq ekinshi deńgeıli 20 bank kiredi.
QDKBQ ótem tóleý úshin arnaıy rezervin únemi tolyqtyryp otyrady jáne kez kelgen sátte ózine mindettemeler qabyldaýǵa daıyn. Búginde QDKBQ-nyń arnaıy rezervinde onyń jarǵylyq kapıtalynyń 70%-yn qosa eseptegende (ol ótem tóleýge paıdalanylýy múmkin) 856 mıllıard teńge jınaqtalǵan. Jınaqtalǵan rezervtiń kólemi jeke tulǵalardyń depozıttik bazasynyń shamamen 7%-yn quraıdy. Bul zańnamada kózdelgen 5%-dyq deńgeıden joǵary.
Osylaısha qazaqstandyqtardyń jınaq aqshalary zańnamada belgilengen kepildik berilgen ótem somasy deńgeıinde tolyq qorǵalǵan.
Depozıtter boıynsha kepildikter týraly tolyq aqparatty QDKBQ-nyń kdif.kz saıtynan jáne baılanys ortalyǵynyń 1460 (qońyraý shalý tegin) qysqa nómirinen alýǵa bolady.
