Qazaqstandyqtardyń densaýlyqqa arnalǵan shyǵyndary MÁMS-tiń arqasynda 5,4%-ǵa tómendedi
MÁMS reformasy, eń aldymen, qazaqstandyqtardyń otbasylyq bıýdjetin medıtsınalyq kómekke jumsalatyn shyǵyndardy únemdeýge jáne árbir turǵyn úshin buryn memleket kepildik bergen pakette qarjylandyrylmaǵan qymbat operatsııalar men zerttep-qaraýlardyń qoljetimdiligine baǵyttaldy. Óıtkeni, adamdar bosatylǵan qarajatty bilimge, ál-aýqatyn jaqsartýǵa ınvestıtsııalaı alady.
Eger 2017 jyly halyqtyń medıtsınalyq qyzmetterge aqy tóleýge jumsaıtyn jeke shyǵystarynyń úles salmaǵy densaýlyq saqtaýdyń jalpy bıýdjetiniń 33,1%-yn qurasa, bul DDU belgilegen ruqsat etilgen shekten eki ese kóp bolsa, onda 2022 jyly Ulttyq shottardyń derekterine sáıkes «qaltalyq» shyǵystar 27,7%-ǵa deıin tómendedi.
MÁMS engizilgenge deıin azamattar ambýlatorııalyq emhanalyq kómek kórsetýge jáne dárilik zattardy satyp alýǵa kóp shyǵystar jumsady.
Qosymsha qarjy qarajaty buryn qarjylandyrý tapshylyǵyn bastan ótkergen baǵyttardy damytýǵa baǵyttalǵan. Mysaly, 2022 jyldyń derekteri boıynsha joǵary tehnologııalyq medıtsınalyq qyzmetterdi qarjylandyrý kólemi 3,5 ese, medıtsınalyq ońaltý 12,5 ese jáne konsýltatsııalyq-dıagnostıkalyq kómek 14 ese ulǵaıdy.
Bul rette MÁMS medıtsınalyq kómekti qarjylandyrý kólemin 1,1 trln teńgeden 2,5 trln teńgege deıin ulǵaıtýǵa múmkindik berdi, al elimizdiń bir turǵynyna densaýlyq saqtaý shyǵystary 56,8 myń teńgeden 121,7 myń teńgege deıin ulǵaıdy.
Tek ambýlatorııalyq deńgeıde bekitilgen bir azamatqa shyǵystar 15 914 teńgeden 39 967 teńgege deıin, ıaǵnı 2,5 ese ósti. MSAK-ty qarjylandyrý Densaýlyq saqtaý bıýdjetiniń 34% -yn qurady. MSAK deńgeıinde shyǵystardyń osyndaı eleýli ósýine qaramastan, bastapqy býyndy qarjylandyrý DDU-nyń MSAK qarjylandyrý standarttarymen usynylǵan densaýlyq saqtaý bıýdjetiniń 60% - na jetpeıdi. Osylaısha, MSAK kórsetý shyǵyndaryn odan ári arttyrýdy jalǵastyrý qajet.
Medıtsınalyq kómekke jumsalatyn shyǵystardyń bul ósýi medıtsınalyq uıymdardyń ınfraqurylymyn, tehnıkalyq jaraqtandyrýdy, kadrlarmen qamtýdy, dári-dármekpen qamtamasyz etýdiń qoljetimdiligin damytýǵa, álemdik standarttarǵa sáıkes medıtsınalyq kómek kórsetýdiń úzdik tájirıbelerin engizýge yqpal etedi.
